Janubiy Koreya yoshni hisoblash bo‘yicha an’anaviy uslubdan voz kechish va xalqaro standartga o‘tish haqida qonunlar qabul qildi, natijada uning fuqarolari rasmiy hujjatlarida 1 yoki 2 yilga “yosharadi”. Bu haqda WIONews xabar bermoqda.
Hozirgi paytda Janubiy Koreyada eng keng tarqalgan hisoblash usuli Koreya yosh tizimi bo‘lib, unga ko‘ra, odam tug‘ilganida u bir yoshga kirgan hisoblanadi. Shu bilan birga, Oy taqvimi bo‘yicha har yangi yilning birinchi kunida odamga yana bir yosh qo‘shiladi.
Ikkinchi usul ham bo‘lib, unda odam yoshi tug‘ilganida noldan boshlanadi, 1-yanvar kuni esa bir yosh qo‘shiladi. Bu tizimdan, odatda, chekish va spirtli ichimlik ichish mumkin bo‘lgan yosh chegarasiga yetgan-yetmaganlikni hisoblashda foydalaniladi.
Shuningdek, mamlakatda standart xalqaro tizim ham qo‘llaniladi, bunda tug‘ilganida nol yosh hisoblanib, har yili tug‘ilgan kunida bir yoshdan qo‘shib boriladi. U Janubiy Koreyada 1960-yildan boshlab tibbiy va yuridik maqsadlarda qo‘llaniladi.
Yuzaga kelgan vaziyat tanqidchilari bir yo‘la uchta tizimdan foydalanish natijasida fuqarolarga turli xizmatlar ko‘rsatishda chalkashliklarga uchrash mumkinligini, xatolarni tuzatish esa qo‘shimcha xarajatlar talab qilishini aytgan.
Endi 2023-yil iyunidan boshlab aholining rasmiy hujjatlar aylanmasida faqat xalqaro tizimdan foydalaniladi va Janubiy Koreya fuqarolari bir yilga “yosharadi”.
Izoh (0)