Истанбулда Усмонлилар саройидаги 5 юлдузли меҳмонхонада ёнғин содир бўлди

Истанбулда Кемпински меҳмонхонасида ёнғин содир бўлди, деб хабар бермоқда Туркиянинг Haber нашри.

Ҳудудга кўплаб ўт ўчирувчилар юборилган, меҳмонхона жойлашган кўча ўраб олинган. Меҳмонлар зудлик билан эвакуация қилинган. Дастлабки маълумотларга кўра, ёнғин таъмирлаш ишлари олиб борилаётган тўртинчи қаватда бошланган.

Қутқарувчилар чақирилганидан бир соат ўтиб ёнғин бартараф этилган. Хабарга кўра, бир нафар жабрланувчи касалхонага ётқизилган. Қурбонлар ҳақида маълумот йўқ.

Çırağan Palace Kempinski — беш юлдузли меҳмонхона. У XIX асрда қурилган Чираган Усмонли саройи биносида жойлашган.

Бугун, 9 декабрь куни эрталаб Москва вилоятидаги «Мега Химки» савдо марказида ёнғин чиққани ҳақида хабар берилганди. Мажмуанинг катта қисми ёниб кетган.

«РИА Новости»га фавқулодда хизматлардаги манбаларнинг айтишича, ёнғиннинг асосий версияси — атайин ўт қўйиш деб аталмоқда. Ўз навбатида, «Интерфакс»нинг фавқулодда хизматлардаги суҳбатдоши ўт қўйиш ёнғин версияларидан бири сифатида кўрилаётганини, бироқ ёнғиннинг бошқа эҳтимолий сабаблари, жумладан, «техник сабаблар — электр тармоғидаги қисқа туташув» ҳам истисно этилмаганини айтди.