Россиялик миллиардер Дмитрий Мазепинга тегишли «Алдабара» яхтаси санкциялар туфайли ҳибсга олинганидан бир неча ой ўтиб, Италиянинг Сардиния оролидаги портдан чиқиб кетишга муваффақ бўлган.
Британиянинг The Guardian нашри маълум қилишича, нархи 700 минг—1 миллион евро атрофида бўлган «Алдабара» март ойида Сардиниядаги Олбия портида қўлга олинган. Яхта Россиянинг Украинага босқини бошланганидан кейин санкциялар рўйхатига киритилган олигарх Мазепинга алоқадор эди. Бироқ, нашрнинг қайд этишича, кеманинг эгаси россиялик тадбиркор эканини исботлаш учун вақт керак бўлган, чунки яхта воситачи компаниялар тармоғи орқали рўйхатга олинган.
Июнь ойида, «Алдабара» Мазепинга тегишли экани тасдиқланишидан бир неча соат олдин кема Сардиния портини сирли равишда тарк этган.
Сардиния полицияси маълумотларига кўра, Мазепин бу ишда хорижий компанияни ёллаган, компания ўз навбатида «Алдабара»ни Олбиядан олиб чиққан капитан билан келишиб олган. Сардинияни тарк этгандан сўнг, яхта Тунисдаги Бизерте портида қисқа муддатга тўхтаган, у ердан қаерга кетгани ҳали номаълум.
Полиция маълум қилишича, Мазепин, яхтани олиб чиқишни уюштиришда ёрдам берган компания ва капитан (у кема россиялик тадбиркорга тегишли экани ҳақида билмаганини даъво қилмоқда) — ҳар бири 500 минг еврогача жаримага тортилиши мумкин.
Дмитрий Мазепин — Россиянинг минерал ўғитлар ва аммиак селитраси каби кенг турдаги кимёвий маҳсулотлар ишлаб чиқарувчи «Уралхем» компаниясининг асосий эгаси.
Уруш бошланганидан сўнг, Европа Иттифоқи томонидан киритилган санкциялар доирасида россиялик тадбиркорларнинг ЕИдаги активларини музлатиб қўйиш, жумладан, яхталарини ҳибсга олиш бошланди. ЕИ ҳибсга олинган активларни уруш пайтида Украинага етказилган зарарни қоплаш учун юбориш имкониятини кўриб чиқмоқда.
Изоҳ (0)