Россияда аёллар ва болаларга кишан тақиш тақиқланди
Россияда иқтисодий жиноятларда гумон қилинган аёллар ва вояга етмаганларга қамоқхона кишанларини тақиш тақиқланди. Бу ҳақда мамлакат ички ишлар вазирлиги матбуот хизмати хабар берди.
Россия Ички ишлар вазирлиги вакили Ирина Волкнинг сўзларига кўра, 7 декабрь куни Россия президенти Владимир Путин Инсон ҳуқуқлари бўйича кенгаш йиғилишида ушбу масалани муҳокама қилганидан кейин қонун кучга кирган. Волк гумонланувчиларни қўлга олишда махсус воситаларни танлаш «хавфлилик даражаси»га боғлиқлигини қайд этган.
Суд жараёнларида кишанлардан фойдаланиш мавзусини инсон ҳуқуқлари кенгаши вакили Ева Меркачева кўтарган. Россия раҳбари зўравонлик бўлмаган жиноятларда гумонланувчиларга кишан тақмасликни қўллаб-қувватлаган. У, шунингдек, гумонланувчиларнинг тергов изоляторида узоқ муддат ушлаб турилишини инсон ҳуқуқларининг бузилиши деб атаган.
