Ғарб давлатлари Туркияни нефть етказиб беришни тўхтатганликда айбламоқда

Ғарб давлатлари Туркияни Қора денгиз орқали нефть етказиб беришни тўхтатиб қўйганликда айблади. Бу ҳақда Financial Times хабар берди.

Нашр суҳбатдошларидан бирининг сўзларига кўра, тирбандликда қолган 20 га яқин танкердан 19 таси Қозоғистондан нефть олиб кетмоқда. Бироқ, на танкерлар, на уларнинг юклари нефть нархининг юқори чегарасига алоқадор эмас ва бу уларнинг суғурта ҳолатида ҳеч қандай ўзгариш бўлмаслигини таъминлайди. Нефть етказиб беришнинг кечикиши нарх чекловлари билан эмас, балки Анқаранинг ҳаракатларига боғлиқ.

Туркия қирғоқлари яқинида нефть танкерларидан иборат тирбандлик юзага келди

5 декабрь куни кун давомида Туркия ҳудудий сувларида 19 та нефть танкерларидан иборат тирбандлик юзага келган, кемалар Россия нефтига нисбатан нарх чегараси кучга киргач, Босфор ва Дарданелл бўғозлари рейдларида лангар ташлаб тўхтаган.

5 декабрь куни жорий қилинган нарх чегараси Россия нефти ортилган танкерларга, агар нефть қиймати 60 долларлик нарх чегарасидан юқори бўлса, ушбу товарни Ғарбда суғурта қилдиришни тақиқлайди. Чекловлар киритилгач, Туркия ҳукумати нефть суғурта қилинганини исботловчи далилларни тақдим этишни талаб қила бошлади.

Туркия қирғоқлари яқинида турган кемалардаги нефтнинг катта қисми асли Қозоғистондан келган. Қозоғистон нефти Россияга қувур орқали келиб тушади ва Ғарб санкциялари таъсирига учрамайди.

Мавзуга доир:

• Япония Россия нефть нархига чегара қўйиш қандай таъсирга эгалигини баҳолади
• Ғарбнинг Россия нефтига қарши санкциялари кучга кирди
• Россия Европа Иттифоқи жорий этган нефть нархи чегарасини қабул қилишдан бош тортди