Ўзбекистон бош вазири ўринбосари — энергетика вазири Жўрабек Мирзамаҳмудов энергия таъминотидаги узилишлар юзасидан жамоатчиликка мурожаат қилиб, ҳолатга изоҳ берди.
Аҳолида электр истеъмоли ошиши ҳисобга олинса, Ўзбекистонда яна такроран — январдаги каби блекаут кузатилиши мумкинми?
— Блекаут технологик ҳолат бўлиб, бу хавф доим мавжуд. Буни инкор қилиш керак эмас, чунки энергия тизимимиз нафақат ўзимизда, балки қўшни мамлакатлар билан ҳам интеграциялашган. Шуни инобатга олган ҳолда биз январь ойида бўлган блекаутдан тегишли сабоқ чиқарган ҳолда биринчи навбатда автоматик ўчириш қурилмалари, авариявий ҳолатларнинг олдини олиш тизимлари, марказий диспетчерлик тизими ташкил қилинди.
Чекловлар киритилаётганининг асосий сабаби ҳам шуки, блекаут ҳолатларининг олдини олмоқчимиз. Агар шундай чекловлар киритилмаса, албатта, энергия тизими издан чиқиши ва блекаут юзага келиши мумкин, — дейди вазир.
Январь ойидаги блекаут
Маълумот учун, 2022 йил 25 январь куни соат 11:00 да Ўзбекистоннинг қатор вилоятларида электр энергияси таъминоти узилган. Тошкент метрополитени фаолияти ҳам тўхтаган, республикадаги барча поездлар ўз манзилларига кечикиб етиб бориши айтилган. Тошкент шаҳри ИИББ тибандликларнинг олдини олиш мақсадида кўчага зарурат бўлмаса, шахсий машинада чиқмасликни тавсия қилган.
Мавзуга доир: Электр тизимидаги узилишлар оқибатида етказилган зарар ҳисоб-китоб қилинади — Молия вазирлиги
Энергетика вазирлиги Тошкент вилоятидаги Чорвоқ, Ҳожикент ва Товоқсой гидроэлектр станциялари, Навоий вилоятидаги Навоий иссиқлик электр станцияси, Қорақалпоғистон Республикасидаги Тахиатош иссиқлик электр станцияси ҳамда Фарғона вилоятидаги Фарғона иссиқлик электр маркази орқали энергетика тизимига қувват узатиш бошланганини билдирган. «Дарё» нашри ходимлари ва ўқувчилари соат 14:00 ҳолатига Тошкент шаҳрининг айрим ҳудудларида электр таъминоти тикланганини хабар қилган.
Кейинроқ Президент матбуот котиби Шерзод Асадов «вазият шахсан президент назорати остида» эканини маълум қилиб, фуқароларни саросимага тушмасликка чақирган. Шавкат Мирзиёев топшириғи билан электр энергиясида кузатилаётган носозлик бўйича ҳукумат иштирокида комиссия тузилган.
17:00 да Энергетика вазирлиги Қорақалпоғистон ва Хоразмда электр энергияси тўлиқ тикланганини хабар қилган. 18:00 дан кейин Тошкент шаҳри ва Сирдарё вилоятининг бир қатор ҳудудларида ичимлик суви таъминоти тикланган. 19:00 да Тошкент ИЭСнинг фаолияти қисман тикланиб, 7 та энергоблокдан 5 таси барқарор иш фаолиятига келтирилгани маълум қилинган.
Шунингдек, 19:30 дан кейин Фавқулодда вазиятлар вазирлиги Қамчиқ довонидаги автойўл тунелларида ёритиш тизимлари тиклангани ҳақида хабар берган. Марказий Осиё ягона электр тармоғида 25 январь куни катта авария бўлиши оқибатида Ўзбекистоннинг Афғонистонга электр энергияси етказиб беришни тўхтатгани ойдинлашган.
Изоҳ (0)