«Меҳнати кўп бўлса-да, маоши кам, олган пули ҳалол бўлсин». Жамоатчилик электр монтёрларни олқишламоқда
Тошкент вилояти ҳокимлиги томонидан тасвирга олиниб, ижтимоий тармоқларга тарқатилган суратлар кун суратлари сифатида эътироф этилиб, электр монтёрларнинг олқишланишига сабаб бўлди.
«Дарё»нинг Қашқадарё ҳамда Фарғона вилоятидаги мухбирлари кўп ҳам эътибор берилмайдиган, аммо электр таъминоти соҳасида энг қийин ишни амалга оширувчи электр монтёрлар билан бирга ишга чиқиб, уларнинг фаолиятини кузатди.
Бизнинг асосий фаолиятимиз одамлар орасида, кимнингдир уйи ёнидаги симёғочларда муаммо кузатилса, тезда айтилган манзилга борамиз ёки ҳудудлар электрлаштирилаётган пайтда симёғочлар ўрнатилишию, уларга сим тортилишигача бўлган жараёнларда иштирок этамиз, — дейди «Дарё»нинг Қашқадарё вилоятидаги мухбири билан суҳбатлашган электр монтёрлардан бири.
Суҳбатдошнинг айтишича, у ёшлигидан шу касбга меҳр қўйган.
Кўпчилик баландликдан қўрқмайсанми, симёғочга чиққанда бошинг айланмайдими дея савол беради. Нафақат мен учун, ҳамкасбларим учун ҳам симёғочга чиқиш оддий ҳолга айланган. Биз шунга ўрганганмиз, — дейди электр монтёр суҳбатдош.
Қашқадарё вилоятида фаолият юритувчи монтёр йигитнинг айтишича, улар 1,5—2 миллион атрофида маош олади.
Кам бўлса-да, баракаси бор. Шунга шукр қиламиз доим, — дейди суҳбатдош маоши борасидаги саволга жавоб берар экан.
«Дарё»нинг Фарғона вилоятидаги мухбири Азизжон Эрматов ҳам электр монтёрларнинг иш жараёнини кузатар экан, уларнинг асосан симёғочлар ўрнатилиши, электр сим тортилиши каби жараёнларига дуч келган.
Монтёр бўлганимизнинг яна бир қулай жиҳатларидан бири, нафақат ўзимнинг уйимдаги, қавм-қариндошу, қўни-қўшниларга ҳам электр таъминотидаги носозликлар борасида ёрдам бериб турамиз. Уларнинг бир оғиз раҳмат деган сўзи касбимга бўлган меҳримни орттиради, — дейди Фарғона вилоятида фаолият юритувчи электр монёрлардан бири.
Суҳбатдош «Дарё» мухбирининг «касбингиз ҳаёт учун хавфли касблардан бири, шундай бўлса-да, нега айнан шу касбни танлангансиз», деган саволига жавоб берар экан, касбининг хавфлилик даражасини инкор этмади.
Ҳақсиз, баъзан қайсидир ҳудудда ўз ишини бажараётган ҳамкасбларимиздан бирини ток уриши натижасида вафот этганини эшитиб қоламиз. Шундай пайтларда янаям сергак бўлишга, касбимизнинг хавфли эканини инобатга олиб, хавфсизлик қоидаларига яхшироқ амал қилишга уринамиз. Аммо тақдирда шу бўлса, қочиб қутилиб ҳам бўлмайди. Шунга қарамасдан касбимни яхши кўраман, — дейди у.
