Анвар Санаевнинг клиплари орқали машҳурликка эришган актёр Ботир Мўминов ҳозир нималар билан банд?
Анвар Санаевнинг «Бегонаман», «Йиғла, севгилим», Сардор Мамадалиевнинг «Кўнглимда бир ёр», «Ажралишдик» каби клипларида рол ижро этиб, машҳурликка эришган актёр, режиссёр Ботир Мўминов «Омон-омон» кўрсатувига берган интервьюсида ҳозир нима сабабдан клипларда суратга тушмаётгани ва қандай ишлар билан машғуллиги ҳақида гапириб берди.
«Мақсадим экранга чиқиш бўлган»
Асосан клиплар орқали танилганман, экранда ҳар доим видеоклиплар қўйиб борилар эди. Кўчада юрганимда одамлар таниб қолар эди. Ундан кейин танилишни бошлаганман. Мақсадим экранга чиқиш бўлган, 15 ёшимда шу мақсад қўйганман ва унга эришиш учун жуда ҳам кўп ишларни қилганман. Масалан, ота-онам ўша пайтда катта Panasonic камера олиб беришган эди, ўзимни ўзим суратга олиб ўрганар эдим. Кейин олий ўқув юртига кириш керак бўлган, телевизорга чиқарадиган ўқиш қайси деб борганман.
Маннон Уйғур номидаги санъат олийгоҳига борганман, шуғулланганман. Имтиҳон топширганимда қабул қилинганимни айтишган. Шу билан хурсандчилик, кейинги ҳаракат телевизорга чиқиш эди. Телевидение эшигининг олдида бир ой турганман, шогирдликка, ишга олинг, деб юрар эдим. Ўша пайтда таниқли телебошловчиларнинг олдига бориб илтимос қилганман. Биринчи марта биринчи курслигимда эфирга чиққанман. Ўшанда Бурҳон Шароповни кўрганман, олдига борганман. Улар қаерда ўқишимни, нима иш қилишимни сўраган.
Кейин улар бошловчи бўлишимни айтган, ўша пайтда энг машҳур кўрсатувлардан «Еттидан етмишгача» ва «Салом, ёшлар» кўрсатувида бошловчи бўлганман. Кейин клипларга таклифлар тушган, Бурҳон акамнинг ўзи олган. Анвар Санаевнинг клипларига туша бошлаганимдан кейин машҳурлик оша бошлаган. Бир дона клипнинг орқасидан стадионлар тўлиб бошлаган, кейин Анвар ака мени таклиф қилган. Эсимда, Андижонда 25 000 нафар томошабин сиғадиган стадионда катта концертда мени эълон қилди, олқишлар, эътирофлар бўлди. Шундан кейин машҳурлик нима эканини ҳис эта бошлаганман. Менинг яхши кўрган касбим — кадр ортида актёрлар, телебошловчилар билан ишлаш.
«Агар чақирса, бориб бажонидил рол ўйнагим келади»
Тўғрисини айтаман, ҳозир клипларга мени ҳеч ким таклиф қилмайди. Аниқ таклиф йўқ, гапда бор. Таклиф қиламиз, дейишади, тайёр бўлиб борсам, қанақадир нюанслар бошланади. Шунинг учун режиссёр ёки оператор бўлганим учунми, талабаларга техник томондан маслаҳат бераман десам ёқмай қолади. Ҳамманинг ўз йўналиши бор. Агар чақирса, менга озгина йўл-йўриқ кўрсатса, бориб бажонидил рол ўйнагим келади. Мени асосан салбий ролда танишган, ижобий ролларни ҳам яхши маҳорат билан ўйнай оламан.
Ботир Мўминов ҳозир нималар билан машғуллиги ҳақида
Ҳозирда ижод билан машғулман, сафарларга вақтим йўқ. Қозоғистонда 3-4 та лойиҳам бор. У ердаги ёш ижодкорлар билан ишлайман, видео-продюсерман. Концертлар уюштираман, клиплар суратга оламан.
