Anvar Sanayevning “Begonaman”, “Yig‘la, sevgilim”, Sardor Mamadaliyevning “Ko‘nglimda bir yor”, “Ajralishdik” kabi kliplarida rol ijro etib, mashhurlikka erishgan aktyor, rejissor Botir Mo‘minov “Omon-omon” ko‘rsatuviga bergan intervyusida hozir nima sababdan kliplarda suratga tushmayotgani va qanday ishlar bilan mashg‘ulligi haqida gapirib berdi.
“Maqsadim ekranga chiqish bo‘lgan”
Asosan kliplar orqali tanilganman, ekranda har doim videokliplar qo‘yib borilar edi. Ko‘chada yurganimda odamlar tanib qolar edi. Undan keyin tanilishni boshlaganman. Maqsadim ekranga chiqish bo‘lgan, 15 yoshimda shu maqsad qo‘yganman va unga erishish uchun juda ham ko‘p ishlarni qilganman. Masalan, ota-onam o‘sha paytda katta Panasonic kamera olib berishgan edi, o‘zimni o‘zim suratga olib o‘rganar edim. Keyin oliy o‘quv yurtiga kirish kerak bo‘lgan, televizorga chiqaradigan o‘qish qaysi deb borganman.
Mannon Uyg‘ur nomidagi san’at oliygohiga borganman, shug‘ullanganman. Imtihon topshirganimda qabul qilinganimni aytishgan. Shu bilan xursandchilik, keyingi harakat televizorga chiqish edi. Televideniye eshigining oldida bir oy turganman, shogirdlikka, ishga oling, deb yurar edim. O‘sha paytda taniqli teleboshlovchilarning oldiga borib iltimos qilganman. Birinchi marta birinchi kursligimda efirga chiqqanman. O‘shanda Burhon Sharopovni ko‘rganman, oldiga borganman. Ular qayerda o‘qishimni, nima ish qilishimni so‘ragan.
Keyin ular boshlovchi bo‘lishimni aytgan, o‘sha paytda eng mashhur ko‘rsatuvlardan “Yettidan yetmishgacha” va “Salom, yoshlar” ko‘rsatuvida boshlovchi bo‘lganman. Keyin kliplarga takliflar tushgan, Burhon akamning o‘zi olgan. Anvar Sanayevning kliplariga tusha boshlaganimdan keyin mashhurlik osha boshlagan. Bir dona klipning orqasidan stadionlar to‘lib boshlagan, keyin Anvar aka meni taklif qilgan. Esimda, Andijonda 25 000 nafar tomoshabin sig‘adigan stadionda katta konsertda meni e’lon qildi, olqishlar, e’tiroflar bo‘ldi. Shundan keyin mashhurlik nima ekanini his eta boshlaganman. Mening yaxshi ko‘rgan kasbim — kadr ortida aktyorlar, teleboshlovchilar bilan ishlash.
“Agar chaqirsa, borib bajonidil rol o‘ynagim keladi”
To‘g‘risini aytaman, hozir kliplarga meni hech kim taklif qilmaydi. Aniq taklif yo‘q, gapda bor. Taklif qilamiz, deyishadi, tayyor bo‘lib borsam, qanaqadir nyuanslar boshlanadi. Shuning uchun rejissor yoki operator bo‘lganim uchunmi, talabalarga texnik tomondan maslahat beraman desam yoqmay qoladi. Hammaning o‘z yo‘nalishi bor. Agar chaqirsa, menga ozgina yo‘l-yo‘riq ko‘rsatsa, borib bajonidil rol o‘ynagim keladi. Meni asosan salbiy rolda tanishgan, ijobiy rollarni ham yaxshi mahorat bilan o‘ynay olaman.
Botir Mo‘minov hozir nimalar bilan mashg‘ulligi haqida
Hozirda ijod bilan mashg‘ulman, safarlarga vaqtim yo‘q. Qozog‘istonda 3-4 ta loyiham bor. U yerdagi yosh ijodkorlar bilan ishlayman, video-prodyuserman. Konsertlar uyushtiraman, kliplar suratga olaman.
Izoh (0)