Украина президенти Владимир Зеленский америкалик бизнесмен Илон Маскни мамлакатга ташриф буюриб, шундан кейин низони қандай тугатиш ҳақида таклиф беришга чақирди.
«Украинага келинг… Шундан кейин бизга бу урушни қандай тугатиш ҳақида, уни ким бошлагани ва қачон якунлаш мумкин бўлиши ҳақида айтиб берасиз», — деди у The New York Times газетаси томонидан ташкиллаштирилган китоб форумидаги нутқи чоғида.
Шу тариқа, Зеленский журналист томонидан Илон Маскнинг Украинадаги низони ҳал қилиш ҳақидаги таклифини изоҳлаш ҳақида берилган саволга жавоб қилди. Америкалик бизнесмен Украинадаги зиддият Қримнинг Россия таркибида қолиши ва Москва мамлакатнинг нейтрал мақомига эришиши билан тугашини айтганди.
Низони ҳал қилишнинг бундай версиясини Маск октябрь бошидаёқ таклиф этганди. «Катта эҳтимол билан охир-оқибат якун шунақа бўлади. Масала эса фақат унгача қанча одам ҳалок бўлишидан иборат», — деб ёзганди у Twitter’да.
Россия Ташқи ишлар вазирлиги расмий вакили Мария Захарова ўшанда Маскнинг бу тахминалрини дунё жамоатчилиги орасида бўлаётган муҳокамаларнинг бир қисми деб атаганди.
Украина Олий радаси матбуот хизмати Маскка «Йўқ» деб жавоб берди. Украина ички ишлар вазири собиқ ўринбосари Антон Герашченко постга ёзган жавобида бундай шартлар билан битим тузиладиган бўлса, «Россия ўзига Аляскани қайтариб олиши керак»лигини таъкидлаганди.
Украинанинг Германиядаги собиқ элчиси Андрей Мелник Маскнинг гапларига жавобан, унга «туёғини шиқиллатиши»ни айтди.
Маскнинг постлари Twitter фойдаланувчиларининг ҳам кескин муносабатига сабаб бўлди, Tesla акциялари 9 фоизга тушиб кетди. Зеленский фойдаланувчиларга уларга қанақа Маск ёқишини танлашни таклиф қилди: «Украинани қўллаб-қувватлайдиганми ёки Россия тарафдори бўлганми?», аксарият биринчи вариантни танлади.
Изоҳ (0)