Тошкент вилоятида тадбиркорга электр учун салкам 300 млн сўм асоссиз қарздорлик ёзилди
Тошкент вилоятида тадбиркорга электр энергияси учун 300 миллион сўмга яқин асоссиз қарздорлик ҳисоблангани маълум бўлди. Монополияга қарши курашиш қўмитаси ҳолат юзасидан маълумот берди.
Қайд этилишича, қўмитанинг Тошкент вилояти ҳудудий бошқармасига 21 сентябрь куни «Чиноз йўлиндустрия» МЧЖ томонидан мурожаат келиб тушган. Мурожаатда электр энергиясидан фойдаланиш жараёнида трансформатор ва электр тармоқларида йўқотишларни ҳисоблашда техник хатоликка йўл қўйилгани оқибатида тадбиркорга 2020 йилдан 2022 йил сентябрь ойига қадар жами 200 181 600 сўм ортиқча қарздорлик ҳисобланган ҳамда ушбу қарздорлик ўз вақтида тўланмагани учун 89 617 088,7 сўм қўшимча пеня ҳисоблангани кўрсатиб ўтилган.
Мурожаатда кўрсатилган норозиликлар юзасидан ҳудудий бошқарма томонидан «Ўзэнергоинспекция» Тошкент вилояти ҳудудий бўлимига ҳамда «Тошкент ҳудудий электр тармоқлари» АЖ га 2022 йил 28 сентябрь куни хат юборилган. Мурожаатда келтирилган ҳолатлар қайта кўриб чиқилиши ва тегишли ҳужжатлар ҳудудий бошқармага тақдим этилиши сўралган. Мурожаатдаги ҳолат Монополияга қарши курашиш қўмитасининг Тошкент вилояти ҳудудий бошқармаси ва «Ўзэнергоинспекция» Тошкент вилояти ҳудудий бўлими билан биргаликда ўрганилганда томонлар ўртасида имзоланган шартномада электр энергиясидан фойдаланишда истеъмолчининг барча ҳуқуқ мажбуриятлари кўрсатилган.
Бироқ электр энергиясидан фойдаланиш жараёнида трансформатор ва электр тармоқларида йўқотишларни ҳисоблашда техник хатоликка йўл қўйилгани оқибатида тадбиркорга жами 200 181 600 сўм ортиқча қарздорлик ҳисобланган ҳамда ушбу қарздорлик ўз вақтида тўланмагани учун 89 617 088 сўм қўшимча пеня ҳисоблангани маълум бўлди. «Тошкент ҳудудий электр тармоқлари» АЖ томонидан «Чиноз йўлиндустрия» МЧЖга асоссиз ҳисобланган қарийб 300 миллион сўм қарздорлик ҳисобдан чиқарилган.
Сентябрь ойида Монополияга қарши курашиш қўмитасининг Тошкент вилояти ҳудудий бошқармасига Қибрай туманидаги тадбиркор мурожаат қилиб, унга электр энергиясидан асоссиз ҳисобланган жами 114 167 880 сўм қарздорлик ҳисобланганини маълум қилган эди. Натижада «Тошкент ҳудудий электр тармоқлари» АЖга нисбатан иш қўзғатилган ва асоссиз қарздорлик ҳисобдан чиқарилган.
