Toshkent viloyatida tadbirkorga elektr energiyasi uchun 300 million so‘mga yaqin asossiz qarzdorlik hisoblangani ma’lum bo‘ldi. Monopoliyaga qarshi kurashish qo‘mitasi holat yuzasidan ma’lumot berdi.
Qayd etilishicha, qo‘mitaning Toshkent viloyati hududiy boshqarmasiga 21-sentabr kuni “Chinoz yo‘lindustriya” MCHJ tomonidan murojaat kelib tushgan. Murojaatda elektr energiyasidan foydalanish jarayonida transformator va elektr tarmoqlarida yo‘qotishlarni hisoblashda texnik xatolikka yo‘l qo‘yilgani oqibatida tadbirkorga 2020-yildan 2022-yil sentabr oyiga qadar jami 200 181 600 so‘m ortiqcha qarzdorlik hisoblangan hamda ushbu qarzdorlik o‘z vaqtida to‘lanmagani uchun 89 617 088,7 so‘m qo‘shimcha penya hisoblangani ko‘rsatib o‘tilgan.
Murojaatda ko‘rsatilgan noroziliklar yuzasidan hududiy boshqarma tomonidan “O‘zenergoinspeksiya” Toshkent viloyati hududiy bo‘limiga hamda “Toshkent hududiy elektr tarmoqlari” AJ ga 2022-yil 28-sentabr kuni xat yuborilgan. Murojaatda keltirilgan holatlar qayta ko‘rib chiqilishi va tegishli hujjatlar hududiy boshqarmaga taqdim etilishi so‘ralgan. Murojaatdagi holat Monopoliyaga qarshi kurashish qo‘mitasining Toshkent viloyati hududiy boshqarmasi va “O‘zenergoinspeksiya” Toshkent viloyati hududiy bo‘limi bilan birgalikda o‘rganilganda tomonlar o‘rtasida imzolangan shartnomada elektr energiyasidan foydalanishda iste’molchining barcha huquq majburiyatlari ko‘rsatilgan.
Biroq elektr energiyasidan foydalanish jarayonida transformator va elektr tarmoqlarida yo‘qotishlarni hisoblashda texnik xatolikka yo‘l qo‘yilgani oqibatida tadbirkorga jami 200 181 600 so‘m ortiqcha qarzdorlik hisoblangan hamda ushbu qarzdorlik o‘z vaqtida to‘lanmagani uchun 89 617 088 so‘m qo‘shimcha penya hisoblangani ma’lum bo‘ldi. “Toshkent hududiy elektr tarmoqlari” AJ tomonidan “Chinoz yo‘lindustriya” MCHJga asossiz hisoblangan qariyb 300 million so‘m qarzdorlik hisobdan chiqarilgan.
Sentabr oyida Monopoliyaga qarshi kurashish qo‘mitasining Toshkent viloyati hududiy boshqarmasiga Qibray tumanidagi tadbirkor murojaat qilib, unga elektr energiyasidan asossiz hisoblangan jami 114 167 880 so‘m qarzdorlik hisoblanganini ma’lum qilgan edi. Natijada “Toshkent hududiy elektr tarmoqlari” AJga nisbatan ish qo‘zg‘atilgan va asossiz qarzdorlik hisobdan chiqarilgan.
Izoh (0)