Аввал хабар берилганидек, Ўзбекистон Президенти Шавкат Мирзиёевнинг Франция Республикасига олий даражадаги ташрифи доирасида Парижда навбатдаги ўзбек-француз бизнес-форуми бўлиб ўтди. Ушбу тадбир иккала мамлакатнинг 200 га яқин ишбилармон вакилларни қамраб олди. Унинг доирасида «Ўзмиллийбанк» АЖ, Ўзбекистон савдо-саноат палатаси ҳамда гастрономия ва меҳмонхона менежменти соҳасига ихтисослаштирилган Францияснинг «Ferrandi Paris» институти ўртасида ҳамкорлик битими тузилди.
Мазкур битим биринчи навбатда 500дан ортиқ тадбиркорлик субъектларини ўқитиш ва уларнинг меҳмонхона ҳамда ресторан бизнесидаги малакасини ошириш, француз институтининг ўзбек ҳамкорлар билан биргаликда француз, хориж тажрибасини ўрганиш учун маҳаллий олий ўқув юртларида ўқув курсларини ташкил этиш имконини беради. Шунингдек, 2023 йилга келиб Ўзбекистон ҳудудида кенг миқёсдаги, хусусан, туризм, меҳмонхона бизнеси, гастрономия ва бошқа соҳалардаги кадрларни тайёрлаш бўйича таълим маркази тузишга йўл очади. Битим билан, шунингдек, Ўзбекистон президентининг хизматлар соҳасини ривожлантириш соҳасига қарорларининг тегишли қисмлари амалга оширилади.
«Ferrandi Paris» Париж савдо-саноат палатаси қошида 1920 йилда гастрономия ва меҳмонхона менежменти соҳасида етук кадрларни тайёрлаб чиқариш мақсадида ташкил этилган. Институт хизмат кўрсатиш (HORECA йўналиши) соҳасида кадрларни тайёрлаб беришда дунёнинг энг яхши мактабларидан бири саналади. Мактаб меҳмонхона ва ресторан йўналишида бакалавр ҳамда магистрларни тайёрлаш тажрибасини алмашиш мақсадида хорижий таълим муассасалари билан муносабатларни ривожлантириб бормоқда. Ҳар йили «Ferrandi Paris» 3 мингдан зиёдроқ, шу жумладан, ер юзининг 30 мамлакатидан келган 300 нафар талабаларни қабул қилади.
Изоҳ (0)