Шавкат Мирзиёев 22 ноябрь куни Франция миллий ассамблеясига ташриф буюрганди. Давлат раҳбари Франция Миллий йиғини раиси Яел Браун-Пиве билан парламентлар ўртасидаги ҳамда ижтимоий-сиёсий ҳаётни янада демократлаштириш бўйича ислоҳотларни амалга ошириш борасидаги ҳамкорликни чуқурлаштириш юзасидан фикр алмашди.
Президент матбуот хизматининг хабар қилишича, Франция Миллий йиғини раҳбари Ўзбекистонда, шу жумладан, парламентаризмни ривожлантириш, инсон ҳуқуқ ва эркинликларини таъминлаш ва ҳимоя қилиш, гендер тенгликни илгари суриш бўйича амалга оширилаётган кенг кўламли демократик янгиланишларнинг боришини юксак баҳолади.
Гендер тенгликни таъминлаш жиҳатларига алоҳида эътибор қаратилди. Ўзбекистон бу борада катта муваффақиятларга эришгани, хотин-қизлар қонун чиқарувчи ва ижро этувчи ҳокимият идораларида, тадбиркорлик ва ижтимоий соҳада муносиб ўрин эгаллаётгани қайд этилди.
2022 йил сентябрида Ўзбекистонда илк бор жаҳон парламентлари етакчи аёлларининг 14-саммити ўтказилди. Етакчи аёлларнинг ролини ошириш тўғрисида Тошкент декларацияси қабул қилинди.
Учрашувда ўлим жазосини бекор қилиш, инсон ҳуқуқларининг кафолатларини кучайтириш, экологик муаммоларни ҳал этиш тўғрисидаги нормалар ва бошқа муҳим қоидаларни мустаҳкамлаб қўйиш кўзда тутилган конституциявий ислоҳотни амалга оширишга тайёргарлик борасидаги асосий ёндашувлар муҳокама қилинди.
Парламентлараро дўстлик гуруҳининг учрашувларини ўтказиш, БМТнинг Инсон ҳуқуқлари бўйича кенгаши, Европа Парламенти, Парламентлараро иттифоқ, ЕХҲТ Парламент ассамблеяси доирасидаги ҳамкорликни кучайтиришга келишиб олинди.
Шунингдек, Франция Миллий йиғини раисини ўзи учун қулай вақтда ташриф билан Ўзбекистонга боришга таклиф этди.
Изоҳ (0)