«Бугун тарихий кун — биз мамлакатимиз жанубига қайтмоқдамиз». Зеленский Херсоннинг озод қилиниши ҳақида

Украина президенти Владимир Зеленский урушнинг 261-кунидан кейинги видеомурожаатида рус қўшинларининг Херсондан чекиниши ҳақида фикр билдирди.

Бугун тарихий кун — биз юртимизнинг жанубига қайтмоқдамиз. Биз Херсонга қайтдик. Ҳимоячиларимиз шаҳар чеккасида. Аммо шаҳарда махсус бўлинмаларимиз аллақачон мавжуд.

Херсон аҳолиси буни кутаётган эди. Улар ҳеч қачон Украинани тарк этмаган. Украинага бўлган умид ҳар доим оқланади ва Украина ҳар доим ўзиникини қайтариб олади.

Зеленский яқин орада шаҳарда «барқарорлаштириш чоралари» ва миналардан тозалаш ишлари бошланишини, шунинг учун ҳозирча ОАВ вакиллари Херсонга киритилмаслигини айтди.

Украина президенти, шунингдек, Днепрнинг ўнг қирғоғида ташлаб кетилган Россия ҳукумати билан ҳамкорлик қилган россиялик ҳарбийлар ва маҳаллий аҳолига мурожаат қилди. Зеленский улардан Украина асирлигига таслим бўлишни сўради.

• Херсон Украина босқинининг бошидан бери рус армияси томонидан қўлга киритилган ягона минтақавий марказ эди.
• Херсонни тарк этиш тўғрисидаги қарорни 9 ноябрь куни Россия мудофаа вазири Сергей Шойгу Россиянинг Украинага бостириб киришдаги қўмондони генерал Сергей Суровикиннинг ҳисоботидан сўнг эълон қилди. Унинг сўзларига кўра, ҳозирги шароитда шаҳарни тўлиқ таъминлашнинг иложи йўқ ва қўшинларнинг Днепрнинг ўнгдан чап қирғоғига олиб чиқилиши аскарларнинг ҳаётини сақлаб қолади.
• 11 ноябрь куни эрталаб Россия Мудофаа вазирлиги Херсондан чекиниш ҳақида хабар берди. Маълум қилинишича, Днепрнинг чап қирғоғига жами 30 мингдан ортиқ россиялик ҳарбий хизматчи ва 5 мингга яқин қурол-яроғ ва ҳарбий техника олиб ўтилган.