BBC Россиянинг Медиазона хизмати (Россияда «хорижий агент» деб эълон қилинган компания) билан биргаликда очиқ манбалар асосида 11 ноябрь ҳолатига кўра, Украинада 8712 дан нафар россиялик ҳарбий ҳалок бўлганини аниқлади, деб ёзади Meduza.
BBC маълумотларига кўра, ҳалок бўлганлар орасида камида 163 киши сафарбар қилинганлардан. Улардан яна 35 нафари фронтга юборилгунга қадар Россиянинг ўзида вафот этган. Нашр ҳарбий қисмларда сафарбар этилганлар ўлимининг асосий сабабларини юрак касалликлари, бахтсиз ҳодисалар ва спиртли ичимликларни истеъмол қилиш деб атади.
BBC нинг таъкидлашича, қурбонларнинг ҳақиқий сони бундан анча кўп бўлиши мумкин, чунки журналистлар ўтган ҳафтанинг ўзида сафарбар қилинган 72 кишининг ўлимини аниқлашга муваффақ бўлди. Октябрь ойидан бери ҳалок бўлганлар ҳақидаги кўплаб хабарларда уларнинг ҳолати кўрсатилмаганлиги сабабли маълумотларни тўплаш қийин. Шу сабабдан ҳалок бўлганлар шартнома бўйича хизмат қилганми, кўнгилли сифатида фронтга кетганми ёки сафарбар қилинганми, аниқлаш мумкин эмас.
Минтақалар бўйича ҳалок бўлганларнинг аксарияти Краснодар ўлкаси (365 киши), Доғистон (338 киши) ва Бурятияга (332 киши) тўғри келади. Москванинг ўзида 29 кишининг ҳалок бўлгани маълум.
Қўшинлар турларига кўра, моторли милтиқчилар (1603 киши), парашютчилар (1295 киши), кўнгиллилар (949 киши) энг катта йўқотишларга дуч келган. Ҳалок бўлганлар аскарларнинг 2111 нафари қайси қўшинларга тегишли эканлиги ҳақида маълумот йўқ.
Очиқ манбаларга кўра, ноябрь ойи ўрталарига келиб, Украинада Россия армиясининг 2400 дан ортиқ элита мутахассислари, шунингдек, тўрт генерал ва 44 полковник ҳалок бўлган. BBC маълумотларига кўра, жами қурбонларнинг 16 фоизи зобитлардир.
Шунингдек, журналистлар Россия ҳарбийлаштирилган бўлинмалари таркибида жанг қилган 47 маҳбуснинг ўлимини тасдиқлади.
АҚШ штаб бошлиқлари қўмитаси раҳбари, генерал Марк Милли 10 ноябрь куни Россиянинг урушдаги йўқотишлари камида 100 минг киши эканлигини айтди. Миллининг сўзларига кўра, Украина Қуролли кучлари ҳам худди шунча йўқотишга учраган. Бундан ташқари, у Украинада уруш бошланганидан бери 40 мингга яқин тинч аҳоли ҳалок бўлганини тахмин қилди.Украина Қуролли кучлари Бош штаби маълумотларига кўра, Россиянинг йўқотишлари 79 мингдан ортиқ кишини ташкил қилади.
Август ойи охирида Украина Қуролли кучлари бош қўмондони Валерий Залужний Россия босқинидан деярли тўққиз минг нафар украиналик ҳарбий ҳалок бўлганини айтган эди. Россия мудофаа вазири Сергей Шойгу сентябрь ойи охирида 5937 нафар рус аскари ҳалок бўлганини тасдиқлади. Бир ҳафта аввал BBC Украинада Россия армиясининг 6476 нафар ҳарбий хизматчиси ҳалок бўлганини ёзган эди.