Ўзбекистон Европа Иттифоқидан Алишер Усмонов ва унинг синглисига нисбатан санкцияларни бекор қилишни сўрамоқда. Бу ҳақда Financial Times хабар берди.
Усмонов февраль ойида, Россия ва Украина ўртасида уруш бошланганидан сўнг дарҳол Европа Иттифоқи томонидан санкцияга учраган.
Таъкидланишича, Усмонов санкциялар остида қолган 26 нафар россияликдан бири бўлиб, Иттифоқ уни Россия президентининг «севимли олигархларидан» бири деб даъво қилган.
Унинг синглиси Гулбаҳор Исмоилова ҳам Усмоновнинг 600 миллион долларлик «Дилбар» яхтаси каби баъзи мол-мулкларининг қонуний эгаси бўлганлиги сабабли санкцияларга учраган.
Муҳокамалардан хабардор икки кишига кўра, Тошкент Ўзбекистон ва Европа Иттифоқи расмийлари ўртасидаги сўнгги учрашувларда санкциялар юзасидан хавотир билдирган.
Ўзбекистон, агар Европа Иттифоқи чекловларни олиб ташлаш талабларини рад этса, Усмоновга Брюсселга қарши юзага келиши мумкин бўлган судга даъво қилиш учун ҳуқуқий ёрдам кўрсатади.
Нашрнинг таъкидлашича, Россия ва Украина ўртасидаги урушдан олдин 20 миллиард долларга яқин бойлиги бўлган Усмонов ўзи туғилиб ўсган Ўзбекистон билан яқин алоқада бўлиб келган.
Тошкент унга қарши санкциялар, жумладан, активларини музлатиш ва саёҳатни тақиқлаш ўз бойлигининг бир қисмини мамлакатга сармоя киритиш имкониятини чеклаганини таъкидлаган.
Биз Ўзбекистон ҳукуматининг хатти-ҳаракатларини изоҳлай олмаймиз, аммо санкциялар ҳақиқатан ҳам сармоявий ва хайрия лойиҳаларига тўсқинлик қилмоқда, — дейди Усмоновнинг матбуот котиби.
Алишер Усмонов ҳам, унинг синглиси Исмоилова ҳам ўндан ортиқ бошқа россиялик олигархлар қатори Европа Иттифоқи чекловлари устидан расмий шикоят билан мурожаат қилган.
Аммо уларга қарши санкцияларни бекор қилишга қаратилган ҳар қандай ҳаракат Европа Иттифоқининг барча 27 аъзоси томонидан бир овоздан маъқулланиши керак.
Бу эса санкцияларга учраган ўнлаб икки миллатли россиялик олигархлар ҳақида ҳам шунга ўхшаш мунозараларни пайдо қилиши мумкин, — дейди Европа Иттифоқининг кўплаб расмийлари Financial Times нашрига.
Усмоновнинг яна бир синглиси Саодат Нарзиева сентябрь ойида унинг вакиллари «ёлғон айбловларга асосланган» қарорлар устидан муваффақиятли шикоят қилгани учун Европа Иттифоқининг санкциялар рўйхатидан ўчирилган эди.
Изоҳ (0)