Instagram кечиктирилган постларни режалаштириш ва чоп этиш функциясини қўшди

Instagram ижтимоий тармоғи ўз иловасига асосий тасма ва Stories’даги кечиктирилган постларни, шунингдек, Reels видеоларини режалаштириш ва чоп этиш функциясини қўшди. Бу ҳақда хизмат вакиллари расмий аккаунтига таяниб Forbes хабар бермоқда.

Янги функциядан профессионал аккаунт эгалари фойдаланиши мумкин. Бу учун илова созламаларида саҳифа ҳолатини оддийдан профессионалга ўзгартириш керак бўлади. 

Мазкур функция ижтимоий тармоқнинг айрим фойдаланувчилари билан бир неча ҳафталик синовдан сўнг ишга туширилган. 

Сиз буни сўрагансиз ва биз эшитдик! Instagram иловасида контентни режалаштириш воситаларини ишга туширмоқдамиз. Шунинг учун сиз пост ёки видеони 75 кунгача режалаштиришингиз мумкин. Бу хусусият келгуси ҳафталарда бутун дунё бўйлаб тарқалади, бизни кузатиб боринг, — дейилади ижтимоий тармоқ вакиллари хабарида.

Октябр ойи охирида Bloomberg Метаънинг даромадлари ҳақидаги ҳисоботига таяниб, Instagram’нинг ойлик фаол фойдаланувчилари сони дунё бўйлаб 2 миллиард аккаунтга етганини маълум қилганди.