Наманганда маст эркак танишини пичоқлаб қўйди

Наманган вилояти Уйчи туманида 6 ноябрь спиртли ичимлик таъсирида жиноят содир этилди, деб хабар бермоқда Тергов департаменти.

Қайд этилишича, шу куни соат 21:30 ларда Уйчи туманда яшовчи Т.Б. (37 ёшли) танишлари Қ.А., А.М. ва Д.Н. (барчаси 36 ёшда) билан бирга Уйчи туман Шўрқишлоқ кўчасида жойлашган Н.Ш.ни уйи ёнида спиртли ичимлик истеъмол қилган. Шу пайт Қ.А. билан Т.Б. трактордан фойдаланганлик учун тўлов қилиш кераклиги бўйича гап тортишиб қолган.

Оқибатда Қ.А. ёнидаги ошхона пичоғи билан Т.Б.ни чап қорин қисмига бир маротаба уриб тан жароҳати етказган.

Суд тиббий экспертиза хулосасида Т.Б. «оғир» турдаги тан жароҳат олгани кўрсатилган.

Ҳолат юзасидан Наманган тумани Уйчи тумани ИИБ ҳузуридаги тергов бўлинмаси томонидан Қ.А.га нисбатан Жиноят кодексининг 104-моддаси 2-қисми «л» банди (қасддан баданга оғир шикаст етказиш) билан жиноят иши қўзғатилиб, у процессуал тартибда ушланган.

Ҳозирда тергов давом этмоқда.