Тошкент шаҳри Сергели туманида 2,5 миллиард сўмлик имтиёзли кредит маблағларини талон-торож қилган шахслар аниқланди, деб хабар бермоқда Иқтисодий жиноятларга қарши курашиш департаменти.
Қайд этилишича, Бош прокуратура ҳузуридаги департаментнинг Сергели туман бўлими томонидан терговга қадар текширув ўтказилган. Унда«А.» МЧЖ раҳбари ва бошқалар банк филиалидан эҳтиёт қисмларни сотиб олиб, савдо фаолиятини кенгайтириш учун ажратилган 2,5 миллиард сўм имтиёзли кредит эвазига «Т.» МЧЖ томонидан эҳтиёт қисмлар етказиб берилмаган бўлса-да, гўёки эҳтиёт қисмлар етказиб берилганлиги тўғрисида сохта ҳужжатларни расмийлаштиргани аниқланган. У ушбу кредит маблағларини ўзлаштириш йўли билан талон-торож қилган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилган. Ҳозирда тергов ҳаракатлари ўтказилмоқда.
Изоҳ (0)