Наманганда интим мавзудаги видео ва аудиоёзувларни ижтимоий тармоқларда тарқатмаслик эвазига 30 минг доллар талаб қилган шахс қўлга олинди
Наманганда интим мавзудаги видео ва аудиоёзувларни ижтимоий тармоқларда тарқатмаслик эвазига 30 минг доллар талаб қилган шахс қўлга олинди. Бу ҳақда «Дарё» мухбири Азизбек Абдувалиев хабар бермоқда.
Наманган туманида яшовчи фуқаро вилоят ИИБга мурожаат қилиб, дори-дармон савдосида ҳамкорликда ишлаб келаётган аёл шериги билан бирга Самарқандга кетаётган пайт интим мавзуда ўзаро суҳбатлашишгани, орадан уч кун ўтиб номаълум шахс унга қўнғироқ қилиб, мазкур мулоқотга оид видео ва аудиоёзувларни ижтимоий тармоқда тарқатмаслик эвазига 30 минг доллар талаб қилаётганини билдирган ва чора кўришни сўраган.
Ушбу аризага асосан ИИВ шахсий хавфсизлик бош бошқармаси вилоят бошқармаси, ЖҚБ коррупция ва иқтисодий жиноятларга қарши курашиш бўлими ходимлари томонидан тезкор тадбир ўтказилди.
Ўтказилган тезкор тадбир давомида аризачидан 30 минг доллар талаб қилган шахслар махсус кимёвий ишлов берилган 20 минг АҚШ доллари ва 110 миллион сўмни Наманган шаҳридаги Нодира кўчасида олишган пайт ашёвий далиллар билан қўлга олинган.
Вилоят ИИБ матбуот хизматининг маълум қилишича, мазкур ҳолат юзасидан Ўзбекистон Республикаси Жиноят кодексининг 165- моддаси 3-қисми билан жиноят иши қўзғатилиб, гумон қилинувчи ушланган. Ҳозирда терговга қадар суриштирув ишлари олиб борилмоқда.
