Бензема Карло Анчелотти қўл остида «Олтин тўп»га эга чиққан 4-футболчига айланди. Бу мураббийлар ичидаги рекорд натижа

«Реал» ҳужумчиси Карим Бензема 2022 йилги «Олтин тўп» соҳибига айланди.

Бензема Карло Анчелотти қўл остида мазкур индивидуал совринга эга чиққан тўртинчи  футболчига айланди. Ундан аввал «Реал» сафида Криштиану Роналду, «Милан»да Кака ва Андрей Шевченко «Олтин тўп»ни қўлга киритганди.

Анчелотти «Олтин тўп»нинг тўрт нафар турли соҳибларига устозлик қилган тарихдаги илк мураббийга айланди.

«Реал» президенти Флорентино Перес даврида эса бешинчи футболчи мазкур совринга эга бўлди. Аввалроқ Луиш Фигу, Роналдо, Криштиану Роналду (4 марта) ва Лука Модрич «Олтин тўп» эгасига айланганди.

Перес бу борада «Милан» собиқ президенти Силвио Берлусконининг рекордини такрорлади. Берлускони даврида Руд Гуллит, Марко ван Бастен (3), Жорж Веа, Андрей Шевченко ва Кака ушбу совринга лойиқ кўрилган.