Ўзбекистоннинг Бирлашган Араб Амирликларидаги дипломатик ваколатхоналари томонидан БААнинг Facetime Management Service (ФМС) компанияси раҳбари, Швейцария бизнес кенгаши аъзоси Надин Патрик Кудиннинг Тошкент ва Самарқанд шаҳарларига ташрифи уюштирилди. Бу ҳақда «Дунё» ахборот агентлиги хабар қилди.
Қайд этилишича, ушбу ташрифдан кўзланган мақсад Ўзбекистонда туризм соҳасида кадрлар тайёрлашда Швейцария таълим тизими асосида ҳамкорлик қилиш, «Ишга марҳамат» мономарказлари фаолияти билан яқиндан танишиш ҳамда компания билан ҳамкорлик қилувчи Яқин Шарқ, Маврикий, Сейшел ва Мальдив оролларидаги меҳмонхоналарга озиқ-овқат маҳсулотларини экспорт қилиш масалалаларини муҳокама қилишдан иборат бўлди.
БАА делегацияси аъзолари Ўзбекистон Туризм ва маданий мерос, Бандлик ва меҳнат муносабатлари, Олий ва ўрта-махсус таълим ҳамда Қишлоқ хўжалиги вазирликларида учрашувлар ўтказиб, ҳамкорлик истиқболларини ўрганган. Шунингдек, Тошкент туризм ва меҳмонхона бошқаруви техникуми, «Ишга марҳамат» мономаркази, «Ипак йўли» туризм ва маданий мерос университети, Самарқанд туризм ва маданий мерос техникуми фаолияти билан яқиндан танишган.
Музокаралар чоғида «Ипак йўли» университети ва Швейцария таълим академияси ўртасида ҳамкорликни йўлга қўйиш, Швейцарияда сертификациядан ўтган қўшма дастурларни жорий қилиш, хорижлик мутахассисларнинг туризм техникумлари ўқитувчиларини тайёрлаш учун Ўзбекистонга жалб қилиш, талабалар амалиётини хорижда ташкил қилиш, шунингдек, мономарказларда касбга тайёрлаш жараёнлари самарадорлигини ошириш борасида биргаликда ишлашга қаратилган таклифлар муҳокама этилган.
Жорий йил 30 ноябрь—2 декабрь кунлари ўтказиладиган Тошкент халқаро туризм ярмаркаси доирасида ҳамкорликка оид ҳужжатларни имзолашга келишиб олинган.
Маълумот учун, ФМС компанияси 1999 йилдан буён БААда фаолият кўрсатиб, меҳмонхоналарга инвесторларни жалб қилиш, меҳмонхона ва рисортлар қурилишида консалтинг хизматларини кўрсатиш, ресторанларда илғор хизмат кўрсатиш тизимларини жорий қилиш, замонавий тажриба марказларини яратиб, уларнинг битирувчиларини иш билан таъминлаш масалалари билан шуғулланади. Swiss Education Academy билан ҳамкорликда Европа, Осиё ва Африка давлатларида 100 дан ортиқ амалиёт дастурларини амалга оширган, Швейцариянинг Cesar Ritz colleges, School оф hotel management, Hotel institute Montreux ва Swiss hotel management school каби ташкилотлар билан ҳамкорлик қилади. 15 та меҳмонхона хўжалигини фойдаланишга топширган, Дубай, Бангкок, Москва, Токио, Гонконг ва Ар-Риёдда турли давлатлар ошхоналарини ишга туширган ҳамдауларга Мишлен сертификатларини олишга кўмаклашган.
Изоҳ (0)