«Ҳар куни бомба овози эшитилади». Россиядаги ўзбекистонлик талабалар элчихона ёрдамидан умидвор
«Дарё» интернет-нашрига Россиянинг Белгород вилояти ҳудудида жойлашган Белгород давлат техника университетининг ўзбекистонлик талабаларидан мурожаат келиб тушди. Улар шаҳардаги ижтимоий аҳвол, уруш фонида ўзгарган яшаш тарзи ҳамда ҳар куни эшитилиб турадиган бомба овозлари ҳақида сўзлаб берди.
Исми сир сақланишини истаган мурожаатчининг айтишича, Белгород области Украина чегарасидан 33 километр нарида жойлашган. Владимир Шухов номидаги Белгород давлат техника университетида 150 га яқин Ўзбекистон фуқароси таҳсил олади.
11 октябрь, сешанба куни тунда Украина айнан шу ҳудуд яқинига, яъни Белгород вилоятининг Шебекино шаҳарчасига жавоб зарбаларини йўллаганди. Украина Қуролли Кучлари томонидан ўққа тутилган подстанцияда ёнғин юзага келган ва бунинг оқибатида икки минг киши электрсиз қолганди. Вилоят губернаторининг маълум қилишича, ҳодиса оқибатида қурбонлар ва жароҳатланганлар йўқ.
Бунинг фонида ҳудуддаги барча мактаб, коллеж ва олий таълим муассасалари 2 ҳафта муддатга масофавий таълим форматига ўтказилди. Ҳаво мудофааси эълон қилинди.
10 дақиқа олдин ҳам 2 марта снаряд тушди
Шухов университетида 150 га яқин ўзбекистонлик талаба бор. Ҳозир 15 кун масофавий ўқиш деб эълон қилган. Ётоқхонада яшаяпмиз, онлайн дарслар ўтиляпти.
Мана, 10 дақиқа олдин ҳам 2 марта снаряд тушди, овози баланд.
Талабаларни урушга мажбурий ёллаш ҳолатлари кузатиляптими?
Йўқ, ҳозирча ундай ҳолат бўлгани йўқ. Тахминан 20 кундан бери ҳаво мудофааси режими ишлаяпти. Кунда бомба овози эшитилади. Кеча биздан 10—15 километр нарироқдаги Шебекино шаҳрига снаряд тушган.
Элчихонага амалий ёрдам масаласида мурожаат қилиндими?
Бугун Курск вилоятига келаркан элчихонадагилар. Ўша ердаги талабалар билан алоқада бўлиб турибмиз. Биз ҳам борамиз учрашувга.Мурожаатчилар бир қанча видеоларни илова қилди. Уларда бомба портлаши ҳамда снаряд овозларини эшитиш мумкин.Бизни Ўзбекистонга эвакуация қилиш масаласини сўраймиз. Уруш ўтган йили февралда бошланган. Қозоғистон март ойидаёқ уруш ҳудудидаги барча талабаларини ўз юртига кўчириб олиб кетганди.
Курск вилоятидаги ўзбекистонликларнинг Шавкат Мирзиёевга мурожаати
11 октябрь куни Россиянинг Курск вилоятида ўқиётган ўзбекистонлик талабалар Украинага чегарадош ҳудудларда хавф тобора ортиб бораётгани сабаб президент Шавкат Мирзиёевга мурожаат билан чиқди. Улар шаҳардаги аҳвол нотинч эканини айтиб, давлат раҳбаридан уларнинг ўқишини Ўзбекистонга кўчириб беришни сўраган.«Биз ўзимиздан ўзимиз ваҳима кўтараётганимиз йўқ. Чунки ҳали бу ерлардаги вазият унчалик нотинч бўлмаган пайтлардаёқ, март ойида Қозоғистон ҳукумати ўз фуқароларини эвакуация қилиб, ўқишларини ўзларига кўчириб берганди. Биз эса вазият сал хавотирли тус олаётган вақтда мурожаат қиляпмиз. Ҳурматли президент, бизнинг ўқишимизни Ўзбекистондаги тиббиёт олийгоҳларига кўчиришингизни илтимос қиламиз», — деган талабалар номидан сўзга чиққан йигит.
ТИВ ваниҳоят тилга кирди
Ташқи ишлар вазирлиги ҳолатга муносабат билдирди. Қайд этилишича, талабаларнинг мурожаати юзасидан Ўзбекистон элчихонаси дипломатлари вазиятни ўрганиш ва мавжуд муаммоларни ҳал қилиш мақсадида Курск вилоятига жўнаб кетган.Натижалар тўғрисида қўшимча ахборот берилади.
