“Daryo” internet-nashriga Rossiyaning Belgorod viloyati hududida joylashgan Belgorod davlat texnika universitetining o‘zbekistonlik talabalaridan murojaat kelib tushdi. Ular shahardagi ijtimoiy ahvol, urush fonida o‘zgargan yashash tarzi hamda har kuni eshitilib turadigan bomba ovozlari haqida so‘zlab berdi.
Ismi sir saqlanishini istagan murojaatchining aytishicha, Belgorod oblasti Ukraina chegarasidan 33 kilometr narida joylashgan. Vladimir Shuxov nomidagi Belgorod davlat texnika universitetida 150 ga yaqin O‘zbekiston fuqarosi tahsil oladi.
11-oktabr, seshanba kuni tunda Ukraina aynan shu hudud yaqiniga, ya’ni Belgorod viloyatining Shebekino shaharchasiga javob zarbalarini yo‘llagandi. Ukraina Qurolli Kuchlari tomonidan o‘qqa tutilgan podstansiyada yong‘in yuzaga kelgan va buning oqibatida ikki ming kishi elektrsiz qolgandi. Viloyat gubernatorining ma’lum qilishicha, hodisa oqibatida qurbonlar va jarohatlanganlar yo‘q.
Buning fonida hududdagi barcha maktab, kollej va oliy ta’lim muassasalari 2 hafta muddatga masofaviy ta’lim formatiga o‘tkazildi. Havo mudofaasi e’lon qilindi.
10 daqiqa oldin ham 2 marta snaryad tushdi
Shuxov universitetida 150 ga yaqin o‘zbekistonlik talaba bor. Hozir 15 kun masofaviy o‘qish deb e’lon qilgan. Yotoqxonada yashayapmiz, onlayn darslar o‘tilyapti.
Mana, 10 daqiqa oldin ham 2 marta snaryad tushdi, ovozi baland.
Talabalarni urushga majburiy yollash holatlari kuzatilyaptimi?
Yo‘q, hozircha unday holat bo‘lgani yo‘q. Taxminan 20 kundan beri havo mudofaasi rejimi ishlayapti. Kunda bomba ovozi eshitiladi. Kecha bizdan 10—15 kilometr nariroqdagi Shebekino shahriga snaryad tushgan.
Elchixonaga amaliy yordam masalasida murojaat qilindimi?
Bugun Kursk viloyatiga kelarkan elchixonadagilar. O‘sha yerdagi talabalar bilan aloqada bo‘lib turibmiz. Biz ham boramiz uchrashuvga.Murojaatchilar bir qancha videolarni ilova qildi. Ularda bomba portlashi hamda snaryad ovozlarini eshitish mumkin.Bizni O‘zbekistonga evakuatsiya qilish masalasini so‘raymiz. Urush o‘tgan yili fevralda boshlangan. Qozog‘iston mart oyidayoq urush hududidagi barcha talabalarini o‘z yurtiga ko‘chirib olib ketgandi.
Kursk viloyatidagi o‘zbekistonliklarning Shavkat Mirziyoyevga murojaati
11-oktabr kuni Rossiyaning Kursk viloyatida o‘qiyotgan o‘zbekistonlik talabalar Ukrainaga chegaradosh hududlarda xavf tobora ortib borayotgani sabab prezident Shavkat Mirziyoyevga murojaat bilan chiqdi. Ular shahardagi ahvol notinch ekanini aytib, davlat rahbaridan ularning o‘qishini O‘zbekistonga ko‘chirib berishni so‘ragan.“Biz o‘zimizdan o‘zimiz vahima ko‘tarayotganimiz yo‘q. Chunki hali bu yerlardagi vaziyat unchalik notinch bo‘lmagan paytlardayoq, mart oyida Qozog‘iston hukumati o‘z fuqarolarini evakuatsiya qilib, o‘qishlarini o‘zlariga ko‘chirib bergandi. Biz esa vaziyat sal xavotirli tus olayotgan vaqtda murojaat qilyapmiz. Hurmatli prezident, bizning o‘qishimizni O‘zbekistondagi tibbiyot oliygohlariga ko‘chirishingizni iltimos qilamiz”, — degan talabalar nomidan so‘zga chiqqan yigit.
TIV vanihoyat tilga kirdi
Tashqi ishlar vazirligi holatga munosabat bildirdi. Qayd etilishicha, talabalarning murojaati yuzasidan O‘zbekiston elchixonasi diplomatlari vaziyatni o‘rganish va mavjud muammolarni hal qilish maqsadida Kursk viloyatiga jo‘nab ketgan.Natijalar to‘g‘risida qo‘shimcha axborot beriladi.
Izoh (0)