«Баъзи мансабдорлар ўз фойдасига ёпиқ қилиб олган бу маълумотни». Расул Кушербаев шаҳарларнинг бош режасини махфий ҳужжатлар қаторидан чиқариш кераклиги ҳақида

«Дарё» интернет-нашри Тошкент шаҳри ҳокимлиги қошидаги Жамоатчилик кенгаши билан биргаликда янги — «Маҳалла. Муаммо. Мулоҳаза» лойиҳасини бошлади. Кўрсатувнинг 1-сони меҳмони Расул Кушербаев шаҳарларнинг бош режасини махфий ҳужжатлар қаторидан олиб, жамоатчилик учун очиқ қилиш кераклигини айтди.

Қонунчилик палатаси депутатининг айтишича, шаҳарнинг бош режаси махфий ҳужжатлар қаторида бўлиши — мантиқсиз. Хавфсизлик билан боғлиқ маълумотларни беркитган ҳолда, маълум ҳудуднинг келажакда қай кўринишда бўлишини одамларга кўрсатиш зарур.

Бизда негадир ҳали ҳам шаҳарларнинг бош режаларини махфий ҳужжатлар қаторига қўшиб қўйишган. Аҳоли билмайди ўз маҳалласи келажакда қандай кўринишда бўлишини. Баъзилари уйини таъмирламоқчи, ўзгартирмоқчи бўлади-да, лекин режада нима ёзилганини билмайди. Балки бузилиб кетар у жойлар ҳали.

Ҳеч бўлмаганда ўша коммуникация, бошқа маълумотларни кўрсатмаган ҳолда очиш мумкин-ку. Умумий биноларнинг кўриниши, жойлашувини кўрсатиш керак. Бизда ҳатто шуни ҳам ёпиб ташлашган-да, — дейди депутат.

Расул Кушербаевнинг фикрича, қайси жой нима учун бузиляпти, нима учун кенгайяпти, деган саволларга жавоб берилмайди. Энг ёмони, давлат эҳтиёжи учун оляпмиз, йўлни кенгайтирамиз деб бузилган жойлар ҳам маълум вақтдан кейин кимгадир бизнес марказ ёки дўкон учун бериб юборилган бўлиб чиқяпти.

Алалоқибат, фуқаролар эътироз билдиради сен бошқа гап айтгандинг-ку деб. Лекин исбот йўқ. Буларнинг ҳаммаси бош режанинг йўқлигидан. Баъзи мансабдорлар ўз фойдасига ёпиқ қилиб олган бу маълумотни. Аслида беркитадиган жойи йўқ. Фақат ўша стратегик, энергетик қисмлари бўлиши мумкин, хавфсизлик нуқтаи назардан ёпиқ қилиш керак бўлган. Қолган жойларини қисм-қисм қилиб очиб бериш мумкин-да. Тахминан айтиб бериш мумкин-ку бу ерга нима тушади, қанақа ижтимоий объект эканини. Бунинг нимаси махфий?

Шу нарсалар очиқ бўлса, фуқаролар давлат органлари билан диалогга киришишни бошлайди. Ҳар бир масалада фикрлашади, — дея фикрларини якунлаган меҳмон.