Трамп CNN телеканалини судга бериб, ундан 475 млн доллар товон талаб қилди
АҚШ собиқ президенти Дональд Трамп туҳмат учун CNN телеканалини судга бериб, ундан 475 миллион доллар товон талаб қилмоқда. Бу ҳақда Флорида Жанубий округи суди сайтидаги ҳужжатларда айтилган.
«Телеканал даъвогар ҳақидаги маълумотларни салбий томондан талқин қилди ва у ҳақидаги барча ижобий маълумотларни эътиборсиз қолдирди. CNN ўзининг улкан таъсиридан гўёки ‘ишончли’ ахборот манбаси сифатида фойдаланиб, даъвогарни сиёсий жиҳатдан мағлуб этиш учун томошабинлар ва ўқувчиларнинг онгини ювишга ҳаракат қилди», — дейилади судга юборилган даъвода.
Даъвога кўра, CNN айниқса 2020 йилги президентлик сайловларида «Трампни суриб ташлаш» учун ўз таъсиридан фойдаланган.
Трампнинг адвокатлари таъкидлашича, «CNN томонидан даъвогарни қоралаш ва ҳақорат қилиш кампанияси сўнгги ойларда кучайган, чунки телеканал 2024 йилги сайловларда Трамп президентликка номзодини қўйишидан хавотирда».
The Hill таъкидлашича, туҳматни исботлаш учун давлат амалдорлари ва бошқа жамоат арбоблари журналистлар ўз хабарларида чинакам ғараз ёки ҳақиқатни менсимаслик билан иш тутганини кўрсатиб бера олиши керак. Амалда буни Қўшма Штатларда исботлаш жуда қийин. Мисол учун, The New York Times газетаси 50 йилдан ортиқ вақт давомида туҳмат бўйича бирорта ишда айбдор деб топилмаган.
Трамп президентлик даврида ҳам Демократик партияга яқин ҳисобланган Америка оммавий ахборот воситаларини танқид қилган ва уларни «фейк хабарчилар» деб атаган.
