Қозоғистон: КХШТ Украинага қарши урушда қатнашмайди

Қозоғистон Ташқи ишлар вазирлиги (ТИВ) расмий вакили Айбек Смадияров Коллектив хавфсизлик шартномаси ташкилоти (КХШТ) кучларининг Россия-Украина низосида қатнашиши масаласи кун тартибида мавжуд эмаслигини маълум қилди, деб ёзади Tengrinews.

«Қозоғистон халқаро ҳуқуқ ва БМТ уставига мувофиқ, давлатнинг ҳудудий яхлитлиги ва суверен тенглиги тамойилларидан келиб чиқади. Умуман олганда, КХШТнинг масъулият зонаси ташкилотга аъзо давлатларнинг халқаро тан олинган ҳудудлари билан чегараланган, ва коллектив хавфсизлик ушбу ҳудудлар ичкарисида таъминланади. Шу тариқа, КХШТнинг Россия-Украина низосидаги иштироки кун тартибида йўқ», — деди у.

Шунингдек, Смадияров бир қанча «квазидавлатлар» ҳудудларида Россияга қўшилиш ҳақида бўлиб ўтган референдумлар юзасидан Қозоғистоннинг позициясини маълум қилди.

«Бизнинг позициямиз ўзгаргани йўқ. Бу масалада Қозоғистон давлатларнинг ҳудудий яхлитлиги, уларнинг суверен тенглиги ҳамда халқаро ҳуқуқ ва БМТ низомига мувофиқ тинч яшаши тамойилларига амал қилади. Россия ва Украина ўртасида сиёсий мулоқотни йўлга қўйишга максимал даражада тайёрлигимизни яна бир марта тасдиқлаймиз. Шу билан бирга, бизнинг мамлакатимиз барқарорликни глобал даражада сақлаб қолишни энг муҳим вазифа деб ҳисоблайди. Шунинг учун ҳам позициямиз ўзгаришсиз қолди», — дея қўшиб қўйди ТИВ вакили.

Аввалроқ Қозоғистон Мудофаа вазирлиги, гўёки, Россияга ҳарбий техника юборилаётгани акс этган видео юзасидан изоҳ берган ва бундай хабарларни рад этганди.

Шунингдек, Қозоғистон Ташқи ишлар вазирлиги республика, гўёки, Коллектив хавфсизлик шартномаси ташкилоти (КХШТ) аъзолигидан чиқиши ҳақидаги ахборотни рад этган эди.

КХШТ нима?

КХШТ мақсадлари тинчликни, халқаро ва минтақавий хавфсизлик ва барқарорликни мустаҳкамлаш, аъзо давлатлар мустақиллиги, ҳудудий яхлитлиги ва суверенитетини коллектив асосда ҳимоялашдан иборат.