Тошкент шаҳри Мирзо Улуғбек ва Шайхонтоҳур туманларининг баъзи жойларида газ сизиб чиқиш ҳолати сабабли газ таъминоти вақтинчалик тўхтатилди. Бу ҳақда «Ҳудудгаз Пойтахт» хабар берди.
Қайд этилишича, Мирзо Улуғбек тумани Маҳатма Ганди кўчасида электр тармоқлари корхонаси иш олиб бораётган вақтда ўрта босимли газ қувурига шикаст етган. Оқибатда кучли газ сизиб чиқиш ҳолати юзага келди. Шу сабабли 4 октябрь куни соат 21:05 да Дархон массивида 25 та кўп қаватли уйлардаги 1500 та хонадонда, М.Ганди кўчасидаги 80 та ҳовли хонадонда, Асака кўчасидаги 60 та ҳовли хонадонда ҳамда 16 та улгуржи ташкилотда газ таъминоти 5 октябрь куни соат 09:00 га қадар вақтинчалик тўхтатилди.
Шундай ҳолат Шайхонтоҳур туманида ҳам рўй берди. Уч лола кўчасида йўл қурилиш ходимлари ишлаётган вақтда газ қувурида авария содир бўлгани туфайли 4 октябрь куни соат 20:00 да Нурафшон шоҳкўчаси ҳамда Мужурмон Обид кўчалари кесишмасида жойлашган Макро супермаркетида газ таъминоти вақтинчалик тўхтатилди. Шунингдек, Олимхўжаев, «Самарқанд дарвоза» маҳаллаларида газ босими пасайган. Ҳозирда таъмирлаш ишлари олиб борилмоқда. Авария бартараф этилгачм газ таъминоти қайта тикланади.
«Ҳудудгаз Пойтахт» газ таъминоти филиали таъмирлаш ишлари туфайли етказилаётган ноқулайликлар учун табиий газ истеъмолчилардан узр сўради.
Изоҳ (0)