Ўзбекистонда кутубхона ресурсларини ҳисобга олиш ва сақлаш тартиби белгиланди

Вазирлар Маҳкамасининг «Ахборот-кутубхона муассасаларида ахборот-кутубхона ресурсларини ҳисобга олиш, фондларни сақлаш ва ҳисобдан чиқариш соҳасидаги айрим норматив-ҳуқуқий ҳужжатларни тасдиқлаш тўғрисида»ги қарори қабул қилинди.

Ҳужжат билан Ахборот-кутубхона муассасаларида ахборот-кутубхона ресурсларини ҳисобга олиш тартиби тўғрисидаги низом тасдиқланди, у билан қуйидагилар белгиланган:

• ахборот-кутубхона ресурслари ҳисобини юритишга қўйиладиган талаблар (ҳисобга олиш ахборотининг тўлиқлиги ва ишончлилиги, ахборот-кутубхона фондига ҳар бир кирим ва чиқимни ҳужжатлаштирилган кўринишда расмийлаштириш, қабул қилиш ва ҳисобга олиш шакллари);
• ахборот-кутубхона ресурсларини ҳисобга олиш тизими (ахборот-кутубхона фондининг барча бўлинмаларини ҳисобга олиш, ахборот-кутубхона фонди бўйича давлат статистика ҳисоботини топшириш, айрим ахборот-кутубхона ресурсларининг ҳисобга олиниши);
• ахборот-кутубхона ресурсларини жамланма ва якка тартибда ҳисобга олиш, ахборот-кутубхона фондини ахборот-кутубхона муассасаси томонидан тузиладиган комиссия томонидан текшириш тартиби.

Ахборот-кутубхона муассасаларининг ахборот-кутубхона фондларини сақлаш тартиби тўғрисидаги низомда қуйидагилар назарда тутилган:

• доимий, узоқ муддатли, вақтинчалик сақлаш талаблари;
• ахборот-кутубхона муассасалари томонидан ноёб, алоҳида қимматга эга ва нодир нашрлар фондларини асраш ва сақлашга қўйиладиган асосий талабларни белгилаш;
• ахборот-кутубхона фондларини ташкил этиш ва уларнинг бутлигини таъминлаш, улардан тўғри фойдаланиш қоидаларини белгилаш (ахборот-кутубхона ресурсларини расмийлаштириш, ҳисобга олиш каталоглари ва картотекаларга ажратиш, фондлардан фойдаланишда улардан нусхалар олиш, уларни шикастланишдан сақлаш).

Ахборот-кутубхона ресурсларини ахборот-кутубхона муассасаларининг фондлари ҳисобидан чиқариш тартиби тўғрисидаги низомга мувофиқ, бу ахборот-кутубхона муассасаси директорининг ёки таркибий бўлинма раҳбарининг буйруғи билан амалга оширилади. Шунингдек, ахборот-кутубхона ресурсларини ҳисобдан чиқариш бўйича комиссия фаолиятини ташкил этиш тартиби ва ушбу комиссиянинг асосий вазифалари назарда тутилган.