Бугун,

  • USD 11095.31
  • RUB 173.84
  • EUR 10772.44

Ижтимоий тармоқларда Наманган вилоятининг Чортоқ туманида жойлашган туғуруқхонадаги тиқилинч ҳолат тасвирланган видео тарқалди. «Дарё» мухбири Азизбек Абдувалиев бу ерда бўлиб, вазиятни ўрганди.

Фото: «Дарё» / Жаҳонгир Акромов

 

Чортоқ туман тиббиёт бирлашмаси туғуруқхона бўлими мудири Ҳамида Обидованинг айтишича, бўлимда 50 та ўрин мавжуд. Видео тарқалган куни эса туғиш жараёнидаги аёллар сони 90 нафардан ошиқ бўлган. Айни пайтда эса уларнинг сони 72 нафар, яъни барибир қўшимча 22 та ўринга эҳтиёж бор.

«Тўлғоқ тутган аёллар сони қачон кўпайиб, қачон камайишини тахмин қилиш имконсиз нарса. Баъзан палаталаримизда койкалар бўшаб қолган кунлар ҳам бўлади. Олдинлари, аниқроғи, ўтган асрнинг 80-90 йилларида Чортоқ туманида туғиш ёшидаги аёллар сони ўрача 25 минг нафар, туғуруқхонадаги ўринларимиз сони эса 160 та бўлган. Ҳозир туғиш ёшидаги аёллар сони 55 мингга етди, койкаларимиз эса қисқартирилиб, 50 тага тушиб қолди. Шу сабабли бундай мушкул вазиятга дуч келяпмиз», — дейди Ҳамида Обидова.

Чортоқ туман тиббиёт бирлашмаси туғуруқхона бўлими мудири Ҳамида Обидова.

Чортоқ туман тиббиёт бирлашмаси туғуруқхона бўлими мудири Ҳамида Обидова.
Фото: «Дарё» / Жаҳонгир Акромов

Чиндан ҳам ғалати парадокс: туманда туғиш ёшидаги аёллар сони икки баравар ошган, койкалар сони эса уч баравар қисқарган. Шу сабабли уч кишига мўлжалланган палаталарда 4-5 киши ётишга мажбур бўлмоқда, бўлим йўлакларида эса қўшимча каравотлар шай этиб қўйилган.

Фото: «Дарё» / Жаҳонгир Акромов

Фото: «Дарё» / Жаҳонгир Акромов

Туманнинг чекка Пешқўрғон ва Ҳазратишо қишлоқларида ҳам маҳаллий туғуруқхоналар бор, лекин мураккаб ҳолатларда ва тунги пайт ҳомиладор аёллар барибир шу бўлимга олиб келинади. Мавжуд вазиятдан чиқиш учун туман тиббиёт бирлашмаси гинекология бўлимида қўшимча ўринлар ажратилди, ҳатто туғуруқхона мудираси ва шифокорлар хоналарида ҳам ҳомиладор аёллар учун жойлар тайёрланди, бироқ бу муаммонинг ечими эмаслигини тиббиёт ходимларининг ўзи ҳам тан олмоқда.

Фото: «Дарё» / Жаҳонгир Акромов

Яна бир муаммо шифокорлар етишмаслиги билан боғлиқ. Бўлимда ҳозир 4 нафар шифокор — икки нафар гинеколог ва икки нафар неонатолог ишламоқда. Аслида эса 10 нафар беморга ҳеч йўқ бир шифокор тўғри келиши керак.

Ҳамида Обидованинг айтишича, шундай мураккаб вазият бўлишига қарамай, бўлимда чақалоқлар ва уларнинг оналари билан боғлиқ нохуш ҳолатлар яқин орада кузатилмаган. Бироқ бу ерда фарзандини дунёга келтираётган аёллар ва уларнинг яқинлари мавжуд ҳолатдан мамнун эмаслиги аниқ.

Фото: «Дарё» / Жаҳонгир Акромов

Биз видео тасвирга олинган ўша «машҳур» хонада ҳам бўлдик. Акушер-гинеколог Маҳмуда Бўронованинг таъкидлашича, ўша куни бўлимда туғган аёллар кўпайиб, бу ерга 13 нафар аёл ва уларнинг чақалоқлари жойлаштирилган.

Акушер-гинеколог Маҳмуда Бўронова.

Акушер-гинеколог Маҳмуда Бўронова.
Фото: «Дарё» / Жаҳонгир Акромов

Энди эса қўшимча ўринлар яратилгани туфайли бу муаммо бироз ортга чекиниб, палатада асли қоидаларда талаб этилганидек 5 та койка ҳозирланганини кўриш мумкин.

Фото: «Дарё» / Жаҳонгир Акромов

Наманган вилоят соғлиқни сақлаш бошқармаси мутасаддиларининг «Дарё»га маълум қилишича, шу йилнинг ўтган 9 ойида 50 ўринли туман туғуруқ бўлимида 3700 нафардан ортиқ ҳомиладор аёл фарзандли бўлган. Муассасада жорий йил сентябрь ойига қадар кунига ўртача 13 та туғуруқ амалга оширилган бўлиб, бу вақт оралиғида шифохонанинг ортиқча юклама билан ишлаши деярли кузатилмаган. Бироқ сентябр ойида кунлик туғилишлар сони ўртача 20 тага ортиб кетгани боис, шифохонада ўрин-жой етишмаслиги юзага келган.

Фото: «Дарё» / Жаҳонгир Акромов

«Олиб борилган ўрганишлар натижасида юқоридаги муаммони тезкор бартараф этиш чоралари кўрилди. Яъни тиббиёт бирлашмасидаги самарасиз ишлаётган стационар ўринлар ҳисобидан туғуруқ бўлими учун қўшимча яна 20 та, жами 70 та ўрин-жой ажратилди. Айни пайтда муассасада ҳомиладор аёлларга санитар-эпидемиологик талабларга тўла жавоб берадиган шароитда сифатли тиббий хизмат кўрсатилмоқда», — дейилади бошқарма томонидан билдирилган муносабатда.

Фото: «Дарё» / Жаҳонгир Акромов

Биз бу шароитларни бордик, кўрдик ва ўргандик. Назаримизда, уларни «талабларга тўла жавоб берадиган ҳолатга келтирилди» дейишга ҳали анча эрта. Чортоқда ҳомиладор аёллар учун қўшимча ўринлар зарур ва улар тез орада яратилиши керак. Акс ҳолда ижтимоий тармоқларда тарқалган тасвирлар биринчиси ҳам, охиргиси ҳам бўлмаслиги тайин.

Изоҳ
Асосий янгиликлар
Дунё
“Афғон халқининг сабри билан ўйнашманг” — “Толибон” қўмондонларидан бири Эронни босиб олиш билан таҳдид қилди  
Дунё
Хитойда қайта авж олиши кутилаётган ковид, 3 марта сайланган Эрдўғон, бир ойдан бери намойиш ўтказаётган ҳинд спортчилари — 29 май суратлари
Маҳаллий
Ўзбекистонда доллар курси ошди