Қандли диабетга олиб келиши мумкин бўлган инсулинга резистентликнинг 7 та яширин белгиси

Ҳисоб-китобларга кўра, катталарнинг 25 фоизи инсулин қаршилигининг бир туридан азият чекмоқда. Аслида бу ҳолат жуда хавфли эмас, аммо даволанмаса, у предиабет ва ҳатто иккинчи тоифа диабетнинг ривожланишига олиб келиши мумкин, Албатта, бу касаллик ҳаёт сифати ва давомийлигига сезиларли таъсир қилади. Хавфни ўз вақтида аниқлаш учун қондаги глюкоза даражасини назорат қилиш, шунингдек, инсулинга резистентлик (глюкозанинг ҳужайрага кира олмаслиги билан тавсифланган ҳолат, шунинг учун унинг қондаги миқдори ошади) нинг бошқа белгиларига эътибор бериш муҳимдир, деб ёзади «Новий очаг».

Бел соҳасида ёғ тўпланиши

Аёлларда ортиқча вазн биринчи навбатда сон ва бўксада тақсимланади, эркакларда эса бел соҳасида кўпроқ ёғ тўпланади. Қорин пайдо бўлганда, иложи борича тезроқ шифокорга мурожаат қилиш лозим. Гап шундаки, қорин бўшлиғидаги ёғлар — глюкоза бардошлилигига таъсир қилувчи гормонлар ишлаб чиқаришда фаол ва шу билан диабет хавфини оширади. Глюкоза даражасини текшириб кўриш, эндокринолог билан маслаҳатлашиш, рацион ва турмуш тарзини кўриб чиқишни унутмаслик лозим.

Ҳуснбузар ва кенгайган тешиклар

Инсулинга резистентлик кучайиши билан организм фаол равишда ёғ ишлаб чиқаришни бошлайди, бу эса ўз навбатида тешикларнинг кенгайишига ва ҳуснбузар пайдо бўлишига олиб келади. Агар муаммо аллақачон қийнаётган бўлса, косметологга бормасдан аввал эндокринолог билан маслаҳатлашиш керак.

Поликистик тухумдон синдроми

Тўғрисини айтганда, бу аломат эмас, балки инсулинга резистентлик ривожланиш эҳтимолини жиддий равишда оширадиган омил. Яқинда ўтказилган тадқиқотлар ташхис қўйилган поликистик тухумдон синдроми ва инсулин қаршилигининг ортиши хавфи ўртасидаги бевосита боғлиқликни тасдиқлади.

Соч тўкилиши

Одатда ҳар куни 70 дан 100 тагача соч толаси тушади ва бу меъёр. Аммо тароқ ёки ёстиқда ҳисобга олинмаган сочлар эса глюкоза даражасини текшириб, шифокор билан учрашиш учун жиддий сабабдир. Чунки соч тўкилиши инсулинга резистентлик ривожланишининг яна бир белгисидир.

Шиш

Кўпинча тўпиқ шишади, аммо суюқликнинг турғунлиги организмнинг бошқа қисмларида ҳам бўлиши мумкин. Гап шундаки, буйракларга натрий ва суюқликни организмдан чиқариб ташлашни буюрадиган инсулин мувозанати бузилган бўлса, шиш пайдо бўлиши мумкин. Ушбу аломатни эътиборсиз қолдирмаслик лозим.

Қонда шакарнинг кўтарилиши

Аниқ аломат бўлса-да, кўпинча эътибордан четда қолади. Агар глюкоза даражаси қизил чизиқдан ташқарига чиқмаса, лекин меъёрнинг юқори чегарасига яқинлашса ёки бироз ошиб кетса, шифокор билан маслаҳатлашиш лозим. Бу жиддий касалликнинг биринчи аломати бўлиши мумкин.

Углеводларга бўлган иштиёқ

Инсулинга резистентлик пайдо бўлганда, организм глюкозадан энергия олиш қобилиятини йўқотади ва қонда шакар етарли ёки ҳатто ортиқча бўлишига қарамай, ишлаш учун куч топилмайди. Натижада углеводларга бўлган иштиёқ кучаяди. Булочка, чипс, ширинликлар истеъмол қилиш тинимсиз тинч қўймаса, иложи борича тезроқ шифокор билан маслаҳатлашиш лозим.