Ишлаш жараёнида руҳий саломатликни сақлашнинг 10 усули

Ҳаёт юмушларга тўла. Кимдир кунига тўққиз соат ишлайди, кимдир кичик ёшдаги болаларга ғамхўрлик қилади, кимдир шунчаки чексиз вазифалар ва уй ишлари билан банд. Мия фаолиятини бир соат ёки камида 20 дақиқа давомида тўхтатиш истаги бўлса, бунинг ҳар доим ҳам имкони бўлмаслиги мумкин, деб ёзади Lifehacker.

Бироқ бу стресс, хавотир ва зўриқишларга берилиш керак, дегани эмас. Кун давомида атиги бир неча дақиқа руҳий саломатликни сақлаш, ўзингизга эътибор қаратишга, жисмоний тайёргарлик, ички ҳолат ва ўзингизни яхши ҳис қилишингизга ёрдам беради. Буни синаб кўриш мумкин.

Тўғри овқатланиш

Ишда кўпинча тўғри овқатланиш ва зарарли одатлар билан курашиш унутилади. Тубдан бошқача усулни синаб кўраш мумкин — тушлик учун вақт ажратиб, миядан иш ҳақида эслатма ва фикрларни чиқариб ташлаш керак. Шошилмаслик ва таомдан завқланиш учун ушбу дақиқалардан фойдаланиш керак. Бу руҳий ҳолатни қайта тиклашга ва дам олишга ёрдам беради.

Телефон ва бошқа гаджетларни бир четга қўйишни унутмаслик лозим. Кўпроқ эътиборни таомга қаратиш керак, секин чайнанг, овқатни ҳидланг ва татиб кўринг. Идеал ҳолда, буни ҳар овқат пайтида қилиш керак, аммо бунга вақтингиз бўлмаса, ҳеч бўлмаса нонушта учун бунга вақт ажратинг.

Сайрга чиқиш

Ўзингизни дам олишга ва кун давомида ташқарига чиқишга мажбурланг. Тадқиқотлар шуни исботлайдики, пиёда юриш хавотирланиш даражасини пасайтиради ва кайфиятни кўтаради. Бундан ташқари, хотиржам юриш ҳис-туйғуларга ижобий таъсир ўтказади.

Агар фақат бир соатлик тушлик пайтида юриш имконига эга бўлсангиз, унга 15-20 дақиқа ажратинг. Натижада овқатланиш ва яна ишга тайёрланиш учун ушбу вақт кифоя.

Яқинлар билан мулоқот қилиш

Севган инсонингизга қисқа хабар юборинг, тушлик пайтида ота-онангизга қўнғироқ қилинг ёки дўстларга SMS ёзинг. Яқинлар билан алоқа қилиш окситоцин гормони даражасини оширади, бу эса стрессни енгиллаштиради ва ўзингизни яхши ҳис қилишга ёрдам беради. Агар офисда ишласангиз, ҳамкасблар билан суҳбатлашинг. Ёқимли мулоқот эндорфин ва дофамин даражасини оширади, улар ҳам яхши кайфият учун жавоб беради.

Нафас олиш учун светофорнинг қизил чироғидан фойдаланиш

Мутахассислар автомобиль ёки автобусда ҳаракатланаётган пайтда ҳар бир бекатдан қисқа танаффус сифатида фойдаланишни маслаҳат беради. Ишдан қанчалик кечикканлик ёки сизни нима кутаётгани ҳақида ўйлашнинг ўрнига, дам олинг.

Пастки жағни бир оз пастга туширинг, елкаларини кўтаринг, уларни орқага қайтаринг ва аста-секин асл ҳолатга қайтинг. Бешгача санаб чуқур нафас олинг ва еттигача санаб нафас чиқаринг. Бу амалиёт ақлий саломатликни сезиларли даражада яхшилайдиган фойдали одатга айланади.

Фикр ва тажрибаларни ёзиш

Агар кун давомида фикрлар бир-бирини одатдагидан тезроқ алмашаётганини сезсангиз ёки эътиборни қаратиш қийин бўлса, дафтарни олиб, айнан нима безовта қилаётганини ёзиб олинг. Бу шошилинч иш вазифалари, яқинларингиз ҳақида ташвишланиш ёки шунчаки қайғули фикрлар бўлиши мумкин.

Ушбу амалиёт мияга самарасиз ташвишлардан халос бўлиш имкониятини беради. Бундан ташқари, ёзганларингизни ташлаб юбориш шарт эмас,  ўзингиз устида ишлаш учун ушбу эслатмалардан кейинроқ фойдаланишингиз мумкин.

Севимли подкастни тинглаш

Севимли подкастни иш кунининг охирида ёки уйга қайтаётганда тингланг. Бу оила билан учрашишдан олдин кайфиятни кўтаришга ёрдам беради.

Иш кунини тугатиш учун маросим ўйлаб топиш

Ҳар ким ҳам иш ва шахсий ҳаёт ўртасида, айниқса, уйдан ишлаганда аниқ чегара қўйишга қодир эмас. Кун охирида иш режимидан чиқишга ёрдам берадиган махсус маросимни ихтиро қилинг.

Таътилни режалаштириш

Етарлича дам олишга ишонч ҳосил қилишнинг энг осон усули бу кичик танаффусларни режалаштиришдир. Кундалик жадвалга камида бир неча дақиқани дам олиш учун қўшинг.

Мисол учун, эрталаб қўшимча бир соат ажратиб, уни бутунлай ўзингизга бағишланг ва эртанги кунга мосланг. Ёки 11:00 дан 11:15 гача бўлган бўшлиқ бир пиёла чой ичиш ва қисқа дам олиш учун айни муддао деб қарор қилинг. Мос келадиган усулни топинг ва ўзингизни чалғитишга имкон беринг.

Технологиядан фойдаланишни чеклаш

Кейинги сафар сизга қисқа танаффус керак бўлганда, гаджетларга қўл чўзманг. Бунинг ўрнига дафтар олиб, ўз фикрларингизни ёзинг ёки телефон, ноутбукни талаб қилмайдиган севимли машғулотингизни топинг. Бу мияни қайта ишга туширишга ёрдам беради.

Машқ қилиш

Жисмоний фаоллик ҳар доим керак, айниқса компьютерда кўп вақт ўтказадиганлар учун. Иш жараёнида ёки ошхонада навбатда турганда ҳам организм учун фойдали бўлган енгил машқларни бажариш тавсия этилади. Вақти-вақти билан столдан туриш, қўлларни олдинга ва орқага силкитиш ёки бармоқлар пойабзалга етгунча эгилиш.