Тошкентда қизларни Туркияга фоҳишаликка юбориш билан шуғулланган икки аёлга жазо тайинланди. Бу ҳақда ДХХ матбуот хизмати хабар берди.
Маълум қилинишича, вилоятнинг Ўртачирчиқ туманида яшовчи, аёл М.Р. (1999 йилда туғилган) ҳамда Нурафшон шаҳрида истиқомат қилувчи аёл. Қ.А. (2000 йилда туғилган) ўзаро тил бириктириб, қизларни Туркияга фоҳишалик билан шуғулланиш учун юбориб келган. Туркияда яшовчи яна бир аёл эса қизларга авиачипта сотиб олиш, уларни кутиб олиш ҳамда фоҳишалик билан шуғуллантириш ишларига масъул бўлган.
Жумладан, 2022 йилнинг апрель ойи бошларида М.Р. ва Қ.А. Тошкент шаҳрида яшовчи А.А.ни (1992 йилда туғилган) Туркияга бориб, фоҳишалик билан шуғулланиш орқали ҳар ойда 2 минг доллар ишлаб топишга қизиқтирган ҳамда дастлабки «даромади»нинг тенг ярмини уларга бериши кераклигини тушунтирган.
Ўз навбатида Туркияда яшовчи аёл эса А.А.га хорижга чиқиш паспорти олиши учун 50 доллар ва Тошкент—Истанбул—Анқара йўналиши бўйича авиачипта юборган.
ДХХ ходимлари томонидан ИИВ ҳамкорлигида ўтказилган тезкор тадбирда М.Р. қизни Тошкент халқаро аэропортига олиб келиб, Туркияга юбормоқчи бўлган вақтида қўлга олинган. Тезкор-қидирув тадбирлари жараёнида унинг шериги Қ.А. ҳам ушланган.
Уларга нисбатан Жиноят кодексининг 135-моддаси билан жиноят иши қўзғатилиб, тергов ҳаракатлари олиб борилган ва 2022 йилнинг августида жиноят ишлари бўйича Миробод туман суди томонидан М.Р.га нисбатан 3 йил ва Қ.А.га нисбатан эса 5 йил муддатга озодликдан маҳрум қилиш жазоси тайинланган.
Лекин Қ.А.нинг оилавий шароити, икки нафар вояга етмаган фарзандлари борлиги инобатга олиниб, Жиноят кодексининг 72-моддаси қўлланилиб, тайинланган озодликдан маҳрум қилиш жазоси шартли ҳисобланиб, 2 йил синов муддати белгиланган.
Мавзуга доир: Тошкентда чет эл фуқароси билан келишиб, ёш қизларни Туркияга фоҳишалик учун сотиб юбораётган аёл ушланди
Изоҳ (0)