Тошкентда «Уммон» гуруҳи собиқ хонандаси Зоҳид Ризқиев дўстлари билан ўз машинасида автоҳалокатга учраганди. Соғлиқни сақлаш вазирлиги уларнинг аҳволи ҳақида маълумот берди.
Пойтахт ИИББ берган маълумотга кўра, воқеа 29 сентябрь куни тахминан соат 23:00 да Юнусобод туманида юз берган. У BMW автомашинасини Аҳмад Дониш кўчасидан Янгишаҳар кўчасига қараб ҳайдаб кетаётганида бошқарувни йўқотган. Оқибатда тан жароҳатлари олган Зоҳид ва унинг икки дўсти касалхонага ётқизилган, 1994 йилда туғилган яна бир дўсти воқеа жойида вафот этган.
Соғлиқни сақлаш вазирлигининг маълум қилишича, Зоҳид Ризқиевга «бош мия очиқ жароҳати, бош мия лат ейиши, бош тепа соҳасининг эзилиб йиртилган жароҳати, чап елка соҳаси юмшоқ тўқималари лат ейиши, кома 1-2 даража» ташхиси қўйилган.
Тиббиёт ходимлари томонидан бемор бошидаги жароҳатга бирламчи жарроҳлик ишлови берилган. Оғриқсизлантирилиб, ИВЛ аппаратига уланган. Бош қисми МСКТ, ички аъзолари эса УТТ каби барча зарурий текширувлардан ўтказилган. Айни пайтда у жонлантириш бўлимида. Сунъий нафас олиш аппаратига уланган. Унга барча тегишли тиббий муолажалар кўрсатилмоқда.
Шунингдек, «бош мия очиқ жароҳати, бош мия лат ейиши, бош тепа соҳасининг эзилиб йиртилган жароҳати, кўкрак қафаси лат ейиши» диагнози қўйилган йўловчи Ж.Й. ҳам жонлантириш бўлимида зарур даво муолажаларини олмоқда. Унинг аҳволи ўрта оғир. Ҳушида.
Бемор Ж.I.да эса «бош мия ёпиқ жароҳати, бош мия чайқалиши, чап томон юқори қовоқ, ўнг томон жағ ости ва бўйин соҳалари эзилиб йиртилган жароҳатлари» аниқланган.
Унга тегишли тиббий ёрдам кўрсатилиб, зарур муолажалар ўтказилгач, аҳволи қониқарли бўлгани учун амбулатор шароитда даволаниши учун уйига жавоб берилди.
Соғлиқни сақлаш вазирлиги айни пайтда беморлар саломатлигини ўз назоратига олган. Муолажа жараёнлари учун етакчи тиббиёт мутахассислари жалб қилинган.
Изоҳ (0)