Қозоғистон ҳукумати Россия фуқароларининг республикага оммавий келиши фонида Россия билан музокаралар олиб боради. Бу ҳақда Қозоғистон президенти Қосим-Жўмарт Тўқаев Туркистон вилояти жамоатчилиги билан учрашувда айтиб ўтди.
Сўнгги кунларда бизга Россиядан кўплаб одамлар келаяпти. Уларнинг аксарияти бугунги мушкул вазият туфайли уйидан кетишга мажбур бўлмоқда. Биз уларга ғамхўрлик қилишимиз ва хавфсизлигини таъминлашимиз керак. Бу сиёсий ва гуманитар масала. Ҳукуматга зарур чоралар кўришни топширдим, — дея президентнинг сўзларидан иқтибос келтирди унинг матбуот хизмати.Тўқаевнинг сўзларига кўра, ҳозирги вазиятда Қозоғистон фуқаролари «инсонийлик, сабр-тоқат ва ташкилотчилик кўрсатишга» мажбур.
Бизда инқироз йўқ, ваҳима йўқ. Чет элдан келган меҳмонларга ёрдам кўрсатилади, аммо уларга ҳеч қандай имтиёз берилмайди. Барча ишлар қонун ва мажбуриятларимизга мувофиқ амалга оширилиши керак. Россия томони билан музокаралар олиб борамиз ва бу муаммони мамлакатимиз манфаатларидан келиб чиқиб ҳал қиламиз, — деди у.21 сентябрь куни Россияда «қисман сафарбарлик» эълон қилинганидан сўнг, урушга боришни истамаган россияликларнинг аксарият қисми Қозоғистонга оммавий келишни бошлади. Қозоғистон Ички ишлар вазирлиги маълумотларига кўра, 21 сентябрдан буён республикага 98 мингга яқин Россия фуқароси кириб келган, шундан 64 минг нафари кейинчалик мамлакатни тарк этган.
Изоҳ (0)