Бугун,

  • USD 11014.01
  • RUB 191.8
  • EUR 10674.78

Агар Россия Украинада ядро қуролини қўлласа, бунинг ўз оқибатлари бўлади ва мамлакат «янада кўпроқ яккаланиб қолади». Бу ҳақда АҚШ президенти Жо Байден CBS телеканалига берган интервьюсида маълум қилди, деб ёзади «РБК».

Фото: EPA

Фото: EPA

«Бу урушнинг қиёфасини ўзгартиради. Иккинчи жаҳон урушидан буён мисли кўрилмаган тарзда… Бунинг оқибатлари бўлади», — деди Байден. Журналист агар Россия президенти Владимир Путин бу чегарадан ўтса, айнан қандай оқибатлар бўлишини аниқлаштириб савол берганида, Америка президенти бир фурсат жим туриб қолди.

«Улар дунёда ҳар қачонгидан кўра кўпроқ яккалаб қўйилади. Улар амалга оширадиган хатти-ҳаракатларнинг даражасига қараб, қандай жавоб кўрсатилиши аниқлаштирилади», — дея қўшиб қўйди Байден.

Россия президенти Украинада ҳарбий операция бошланганидан кейин тийиб туриш кучларини алоҳида жанговар навбатчилик режимига ўтказишни топширганди, унга стратегик ядро кучлари ҳам киради. Шу билан бирга, у ядро урушида ғолиблар бўлмаслигини айтиб, уни ҳеч қачон бошламасликка чақирганди.

Россия Хавфсизлик кенгаши раисининг биринчи ўринбосари Дмитрий Медведев Россиянинг ядровий салоҳиятини кўп бора тилга олган ва Ғарб мамлакатларини «ўлим билан шахмат ўйнамасликка» даъват этганди.

АҚШ ҳукумати эса ядро қуролини қўллаш ҳақидаги гапларнинг чўғини пасайтиришни бир неча марта таклиф қилган. Пентагон эҳтимолий ядро уруши муҳокамаси келтириб чиқарадиган хавфга эътибор қаратганди.

15 сентябрь куни БМТ Бош ассамблеясининг 77-сессияси раиси Чаба Кёрёши бу йил дунё 1962 йилги Кариб инқирозидан буён биринчи марта ядро қуроли иштирокидаги уруш хавфига максимал даражада яқинлашганини айтиб ўтди.

Унинг таъкидлашича, воқеаларнинг ҳозирги ҳолати дунёнинг барча мамлакатлари учун «жуда-жуда жиддий огоҳлантириш» бўлиб ҳисобланади.

Изоҳ
Асосий янгиликлар