Бугун,

  • USD 10940.05
  • RUB 182.26
  • EUR 11121.65

Чеченистон раҳбари Рамзан Қодиров Россия минтақалари Украинадаги «махсус операция»да қатнашаётган россиялик ҳарбийларга ёрдам бериш учун сафарбарлик эълон қилиши кераклигини айтди, деб ёзади Meduza. Қодировнинг видеомурожаати унинг Telegram-каналига жойланди.

Фото: «ТАСС»

Фото: «ТАСС»

«Махсус операцияга келсак, буларнинг барчаси аллақачон жанговар ҳаракатларга айланиб кетган. Мендан сўрашганида, мен ҳарбий ҳолат эълон қилган бўлардим ва бу манфурларни тезроқ битириш учун барча имкониятларни ишга солган бўлардим… Агар кимдир истаётган бўлса, давлат раҳбарияти сафарбарлик эълон қилишини кутиш керак эмас, биз ҳаммамиз сафарбар бўлишимиз керак, ҳар битта минтақа ўзида бор куч ва воситаларни, ўзида бор имкониятларни бериши керак. Улар бугунги кунда ҳарбийларимизни нима билан қўллаб-қувватлаши мумкин бўлса, шуни таклиф этиши керак», — деди Қодиров.

Унинг маълум қилишича, Чеченистон Украинага қўшимча тўққиз минг кишини юборишга тайёр (у уларни «кўнгиллилар» деб атади). Ҳатто Россия «махсус операцияси» якунланганидан кейин ҳам, Чеченистон бўлинмалари Украинада урушни давом эттиради, дея қўшиб қўйди у.

«Украина ҳудудида бўлган ёки ҳали шу ерда бўлиб, энди жўнаб кетадиган командирларимнинг барчасига айтдимки, махсус операция тугаса ҳам, бизнинг бу шайтонлар билан урушимиз тугамайди. Биз уларни йўқ қилишимиз керак. Биз чекиниш ёки ён босиш учун улар билан уруш бошламадим. Ҳатто ҳалок бўлсак ҳам, ғалаба қозонамиз — биз жаннатга тушамиз. Ғолиб бўлсак, жаннатда яшаймиз, ердаги жаннатда», — деди Қодиров.

Россия қўшинлари Украинанинг Харьков вилоятида чекинганидан кейин Чеченистон раҳбари «хатоликларга йўл қўйилгани»ни айтганди. Ўзининг янги мурожаатида у Украина Ғарбдан кутилганидан кўпроқ куч ва воситалар олганини, Россия ҳарбийлари эса «қаердадир камчиликка йўл қўйгани»ни қайд этди. Унинг таъкидлашича, Чеченистон бўлинмалари уруш бошида «Херсон, Харьков вилоятларини қўлга киритган» ва Донецк вилоятидаги Мариуполни эгаллаган.

Аввалроқ КPRФ (Россия Федерацияси Коммунистик партияси) етакчиси Геннадий Зюганов Россия Давлат думаси кузги сессиясининг биринчи ялпи мажлисида нутқ сўзлаб, Украинадаги «махсус операция» тўла-тўкис урушга айланиб кетганини маълум қилган эди. КPRФ етакчиси қайд этишича, Дума сессияси ҳали ҳеч «бундай мураккаб ва кескин вазият»да очилмаган. Унинг сўзларига кўра, Давлат думаси таътилда ўтказган икки ой ичида вазият, шу жумладан, фронтдаги ҳолат ҳам «тубдан» ўзгарган. «Лекин ҳар қандай уруш жавобни талаб қилади. Аввало, кучлар ва ресурслар максимал даражада сафарбар этилиши керак. Жамият жипслашиши ва асосий бирламчи вазифалар аниқлаб олиниши керак», — дея қўшиб қўйди сиёсатчи.

Август охирида Украина Қуролли кучлари Херсон вилоятида, сентябрь бошида эса Харьков вилоятида қарши ҳужумга ўтди. Иккинчи йўналишда Украина ҳарбийлари икки ҳафта ичида аҳамиятли даражада муваффақиятларга эришди, Россия эса уруш бошидан буён энг йирик мағлубиятга учради.

Изоҳ
Асосий янгиликлар