Россия Давлат думасини Путинни истеъфога чиқаришга даъват этган Санкт-Петербургнинг «Смольнинское» муниципал округи кенгаши депутатлари полицияга чақирилди, улардан армияни «обрўсизлантирганлик» учун маъмурий қонунбузарлик ҳақида баённома тузиш учун келиш сўралган. Бу ҳақда DW ташаббусни қўллаб-қувватлаган муниципал депутатлардан бири Никита Юферевга таяниб хабар берди. Бундай мазмундаги SMS-хабарлар «Смольнинское» МОнинг барча депутатларига, ҳатто овоз беришда бетараф қолганларга ҳам келган.
Давлат думасини Россия президенти Владимир Путинни давлатга хиёнат сабабли лавозимидан четлатишга даъват этилган мурожаатнома лойиҳаси «Смольнинское» МО кенгаши мажлисига унинг депутати Дмитрий Палюга томонидан киритилган эди. Кенгашнинг йигирма нафар аъзосидан ўн нафари ушбу мурожаатнома бўйича овоз беришда қатнашмаган, аммо қонун бўйича ўн нафар депутат кворум учун етарли бўлган. Охир-оқибат, уларнинг етти нафари мурожаатномани Давлат думасига юборишни ёқлаб овоз берган.
Давлат думасига мурожаатнома нусхасини Палюга ва Юферев ўз Twitter’ларида эълон қилган. Ҳужжатда айтилишича, унинг муаллифлари фикрига кўра, Россия президенти Путиннинг хатти-ҳаракатларида РФ Конституциясининг давлатга хиёнат ҳақидаги моддасида кўзда тутилган жиноятлар белгилари бор. Хусусан, улар Украинада «махсус операция» бошланганидан кейин Россия армияси жангги шай бўлинмаларининг йўқ қилиниши, Россия ёш ва меҳнатга лаёқатли фуқароларининг ҳалокати ва майиб бўлиши, Россия иқтисодиётига зарар етиши, НАТОнинг кенгайиши, шунингдек, Украина армиясининг замонавий Ғарб қуроллари билан таъминланишига эътибор қаратди, бу эса уни «демилитаризация қилиш» (қуролсизлантириш) мақсадига зид бўлиб қолмоқда.
«Смольнинское» МО депутатларининг Давлат думасига мурожаатнома тайёрлаш қарорига тўсатдан келинмаган, деди Юферев. 24 февралдаёқ у Кенгашнинг яна бир депутати, Дмитрий Балтруков ва бошқа муниципалитетлар депутатлари билан бирга Украинадаги урушга қарши митинг ўтказиш учун ариза берган, бироқ шаҳар маъмурияти бунга розилик бермаган. 2 март куни эса муниципал депутатлар Санкт-Петербург фуқароларини Кенгашнинг очиқ мажлисига таклиф қилиб, унда «махсус операция»ни якунлаш кераклиги ҳақида Путинга аталган мурожаатнома келишиб олинган. Унга Кремлдан жавоб бўлмаган.
Августда Юферев Россия президентига яна бир талабнома юборган — шахсан ўз номидан ва «махсус операция»ни «гуманитар мулоҳазалар нуқтаи назаридан» тўхтатишга чақирган. «Ахир миллионлаб украиналиклар қочқинларга айланди, 5 мингдан зиёд одам, шу жумладан, 300 нафар ёш бола ҳалок бўлди», — дейилганди унда. Унга жавоб келган ва мурожаат кўриб чиқилгани, Россия «демилитаризация ва денацификация бўйича махсус ҳарбий операция» олиб бораётгани айтилган.
«Бизнинг барча мурожаатларимиз аслида уларга қаратилмаган… Улар бизга жавоб бермаслигини биз тушуниб турибмиз… Бу кўпроқ, шу ерда, Россияда туриб, бўлаётган воқеалар учун қайғураётган россияликларга йўлланган мурожаатдир. Ҳар сафар биз уларга ёлғиз эмасликларини, бу ерда биз ҳам борлигимизни кўрсатишга интиламиз, бизлар — юз бераётган воқеаларга қарши бўлганлар кўп. Бу, пропаганда айтаётганидек, ‘кам сонли сотқинлар’ эмас. Биз жуда кўпчиликмиз», — деди Никита Юферев.