Туркияда ИШИД етакчиларидан бири қўлга олинди. Бу ҳақда мамлакат президенти Ражаб Тоййиб Эрдўғон 8 сентябрь куни НТВ телеканалида эълон қилди.
«Президент Эрдўғон Туркияда асосий террорчи, ИШИД етакчиларидан бири Абу Зайд/Уста Зайд номи билан танилган Башар Хаттоб Ғазал ал Сумайдай қўлга олинганини маълум қилди», — дейилади телеканал хабарида.
Туркия президенти журналистларга берган интервьюсида Абу Зайдни қўлга олиш учун мамлакат ҳуқуқ-тартибот ва хавфсизлик идоралари ИШИДга қарши муҳим операция ўтказганини айтди. Абу Зайд ИШИД етакчиси Абубакир ал-Бағдодий ва унинг вориси Абдулла Кардаш ўлдирилганидан кейин ташкилотнинг энг муҳим етакчиларидан бирига айланган эди.
Эрдўғон ИШИД террорчиси Истанбул Миллий разведка ва полиция бошқармасида сўроқ қилингани ҳамда бош прокурор номидан суд органларига юборилганини қўшимча қилди. Унга кўра, Абу Зайднинг Сурия ва Истанбулдаги алоқалари анчадан бери кузатиб келинган. Ҳуқуқ-тартибот идоралари ходимлари террорчининг сохта исм ёрдамида Туркияга ноқонуний равишда киришни режалаштираётгани ҳақида тезкор маълумотларни қўлга киритган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.