Гари Невилл: «Манчестер Юнайтед» футболчилар учун қабристонга айланиб қолди

«Манчестер Юнайтед» собиқ футболчиси Гари Невилл жамоанинг сўнгги йиллардаги трансфер сиёсатини кескин танқид остига олди.

Клубнинг сўнгги 10 йилдаги муаммоларидан бири шундаки, улар стратегиядан воз кечиб, мураббийларни ўзгартириб, футболчиларни танлашни назорат қилишига рухсат бериб қўйди.

Бу жиддий муаммо. 10 йил давомида клуб трансферларга 1,2 миллиард фунт стерлинг сарфлади, харажатларнинг 75 фоизи муваффақиятсизликка учради, фақатгина 5 фоизи фойдали бўлди. Яна 20 фоизи на у ёқлик, на бу ёқлик. Трансферлар нуқтаи назаридан қараса, даҳшатли кўрсаткич.

Ундан ташқари футболчиларни айблаш учун доим сабаб топиларди ва биз буни кўп йиллар давомида бажариб келдик.

Кўпчилик қатори мен ҳам ўтган йили Варан, Санчо ва Роналду харид қилинганидан хурсанд бўлгандим. Ди Мария келганди, барчамиз: «О, у жуда яхши трансфер бўлди», — дегандик.

Бироқ амалда клуб футболчилар учун қабристонга айланди. Ўйинчилар энди бу ерга келиш-келмаслик ҳақида бош қотиради. Клуб футболчиларни ўзига жалб қила олмаяпти, академия эса яхши ишламаяпти.

Гари Невилл, футбол эксперти

Манкунианликлар Премьер Лиганинг 1-турида «Брайтон»га, 2-турда «Брентфорд»га қарши ўйинда мағлубиятга учради ва мусобақа жадвалида 20-ўринда бормоқда.