Сирдарё вилояти Мирзаобод туманида уйсиз қолган оила қўйхонада яшаётгани ҳақида хабар тарқалди. Туман ҳокимлиги матбуот хизмати ҳолат юзасидан муносабат билдирди.
Маълум бўлишича, туман ҳокимлиги оила ва хотин-қизлар бўлимига 12 август куни фуқаро М.Муллашева акаси А.Муллашевнинг 3 нафар вояга етмаган фарзанди билан уйсиз қолгани сабабли уй-жойга муҳтожлигини билдириб мурожаат қилган. Мурожаати ижобий ҳал қилиниши юзасидан ҳуқуқий тушунтиришлар берилган бўлса-да, 13 август куни норозилик билдирган видеотасвирларини ижтимоий тармоққа жойлаштирган.
Туман ҳокимлиги мутасаддилари 13 август куни «Баҳористон» маҳалласига бориб, мурожаатчининг яшаш ҳолатини ўрганган. Ўрганиш давомида фуқаро М.Муллашеванинг Кўклам кўчасида онасидан қолган уйи бўлгани ва қуйидагилар аниқланган.
М.Муллашева 1995 йилда турмуш қурган. Биринчи турмушидан икки нафар фарзанди бор. Биринчи турмуш ўртоғи билан 5-6 йил яшаб ажрашган. Шундан сўнг Кўклам кўчасидаги онасининг уйига қайтиб келган. Онасининг вафотидан сўнг уйни сотиб, «Баҳористон» маҳалласи Яккатут кўчасидан уй сотиб олган. Ундан сўнг иккинчи бор турмуш қурган ва 2-3 йил бирга яшаган. Биринчи турмушидаги 2 нафар фарзандини ўз отасига қайтариб берган.
Шундан сўнг яна турмушга чиқиб, 2-3 йил оралиғида турмуш ўртоғи билан бирга яшаган. Унинг турмуш ўртоғи V.Миркомилов М.Муллашеванинг Яккатут кўчасидаги уйини сотиб кетиб қолган. Шундан сўнг Муллашева уйсиз қолиб, ижарада яшаган. 2017 йил Туркияга ишлаш учун кетган. У ерда 4 йил бўлиб, 2021 йил сентябрь ойида Ўзбекистонга қайтиб келган.
Ҳозирда М.Муллашева турмушга чиқиб, Гулистон шаҳрида ижарада яшаб келмоқда. Қарамоғида фарзандлар мавжуд эмас. М.Муллашева видеотасвирга туширган вояга етмаган қизлар акасининг фарзандлари экани, акасини уй-жой билан таъминлаш мақсадида мурожаат қилгани аниқланди.
Аёлнинг акаси А.Муллашев соғлом, ишга яроқли, 3 нафар вояга етмаган фарзанди бор экани маълум бўлди. Турмуш ўртоғи Россияга ишлаш мақсадида бориб, турмушга чиқиб кетгани аниқланди. Шунингдек,у қурилиши тугалланмаган турар жойга эга экани қайд этилди.
У яшаш шароити мос келмайдиган нотурар жойдан вояга етмаган фарзандлари билан биргаликда маҳалла марказидаги Яккатут кўчасида хонадонга кўчириб ўтказилди. М.Муллашева ва унинг акаси А.Муллашевга ҳозирда уйсиз қолгани сабабли имтиёзли субсидия ҳақида тушунча берилди. Уларга доимий бандлигини таъминловчи иш ўринлари таклиф этилди.
Изоҳ (0)