Қашқадарёда МЧЖни ноқонуний текшириб, унинг директори ва ҳисобчисининг жиноий жавобгарлигига сабаб бўлган тафтишчи 12 млн сўм жаримага тортилди

Қашқадарё вилоятининг Миришкор туманидаги МЧЖ фаолиятини ноқонуний текшириб, жамият директори ва ҳисобчисининг жиноий жавобгарлигига сабаб бўлган тафтишчи 12 миллион сўм жарима тўлади. Бу ҳақда «Дарё»га Бизнес омбудсманнинг Қашқадарё вилоятидаги вакили Шероз Шодиев хабар берди.

Маълум қилинишича, Миришкор туманида фаолият юритувчи МЧЖ вилоят Давлат молиявий назорат бошқармаси мансабдор шахси томонидан текширилган. Текшириш якуни бўйича маълумотнома расмийлаштирилган.

«Ушбу текшириш натижаси бўйича 2021 йил 6 сентябрь куни МЧЖ раҳбари ва унинг бош ҳисобчисига нисбатан жиноят иши қўзғатилган. Жиноят иши доирасида МЧЖ раҳбари ва бош ҳисобчиси Жиноят кодексининг 192-11-моддаси (нодавлат тижорат ташкилотида ёки бошқа нодавлат ташкилотида мансабдор шахслар томонидан ўз ваколатларини суиистеъмол қилиш) билан айбланиб, жиноий жавобгарликка тортилган.

Ҳолат ўрганилганда тафтишчи ўтказган ўрганиш ваколатли орган билан келишилмаган ҳолда ўтказилган бўлиб, текширувларни электрон рўйхатга олиш ягона тизимига киритилмаган. Шунингдек, МЧЖ фаолиятида текширишни амалга оширган мансабдор шахс текшириш ҳуқуқини берувчи махсус гувоҳнома эга бўлмаган», — дейди Шероз Шодиев.

Аниқланишича, «Хўжалик юритувчи субъектлар фаолиятини давлат томонидан назорат қилиш тўғрисида»ги қонуннинг 6-моддасида текширувчи мансабдор шахсларга талаблар белгиланган бўлиб, текширувчи хўжалик юритувчи субъектлар фаолиятини текширишга рухсат берилганлиги тўғрисида махсус гувоҳномага эга бўлиши лозим. «Тадбиркорлик фаолияти эркинлигининг кафолатлари тўғрисида» қонуннинг 39-моддасига мувофиқ тадбиркорлик субъектлари фаолиятининг назорат қилувчи органлар томонидан ўтказиладиган барча текширувлари Текширувларни электрон рўйхатга олиш ягона тизимида рўйхатга олиниши шарт.

«Апелляция инстанция томонидан МЧЖга нисбатан 2021 йил 3 августда ўтказилган текшириш юзасидан расмийлаштирилган маълумотнома мақбул эмас деб топилиб, МЧЖ раҳбари ва бош ҳисобчисига нисбатан жиноят иши тугатилди. Шунингдек, Бизнес-омбудсман девони ходимлари томонидан маъмурий баённома асосида МЧЖда ноқонуний текшириш ўтказган Қашқадарё вилоят Давлат молиявий назорат бошқармаси масъул ходими базавий ҳисоблаш миқдорининг 40 баравари миқдорида жаримага тортилди», — дейди Бизнес-омбудсманнинг Қашқадарё вилоятидаги вакили.