«Терговни давом эттириш учун пул сўради — исботим бор». Қашқадарёлик тадбиркор ИИБ мансабдорини тамагирликда айбламоқда (видео)
Қашқадарё вилоятининг Нишон туманида фаолият юритувчи тадбиркор Бекзод Бердиев ИИБ терговчиси ўз ишини якунлаши учун тамагирлик қилиб, ундан пул сўраганини айтмоқда. Бу ҳақда тадбиркор «Дарё»га қилган мурожаатида айтиб ўтди.
Тадбиркорнинг маълумот беришича, у хориждан наслдор чорва моллари олиб келиб, аҳолига тарқатиш билан шуғулланиб келган.
«Юртимизда президентимиз ташаббуси билан ҳар бир оилани тадбиркор қилиш амалиёти бошланганди. Мен ҳам ана шу жараёнда иштирок этиб, хориждан чорва моллари олиб келиб, аҳолига тарқатганман. 2021 йили 13 нафар фуқаро мендан чорва моллари олиб кетиб, пулини бермай кетганди. Шу сабаб бу ҳақда 2022 йилнинг февраль ойида Қашқадарё вилоят прокуратураси, Нишон туман прокуратураси ва туман ИИБга мурожаат қилдим. Мурожаатимга кўра, ҳолат ўрганилиб, Жиноят кодексининг 168-моддаси 4-қисми билан жиноят иши очилди. Ва дастлабки тергов ҳаракатлари бошланди», — дейди тадбиркор.
Тадбиркорнинг қўшимча қилишича, терговни олиб бораётган ИИБ терговичиси ишини якунлаш учун ундан улуш талаб қилган.
«Дастлабки тергов ҳаракатлари бошланган пайтда терговчи одамлардан оладиган пулимдан уларга улуш ажратсам, ишим тезроқ битишини айтиб, мендан пул сўради. Ишим тезроқ битиши учун мен ҳам бунга рози бўлдим», — дейди мурожаатчи тадбиркор.
Бекзод Бердиев ИИБ терговчисига пул ҳам берганини, буни исботловчи далиллари борлигини айтмоқда.
«Дастлаб сўралган пулни бердим, лекин ишим битмади. Бироздан сўнг улар менга яна қўнғироқ қилиб, ИИБга текширувчи келганини, шу сабаб моддий кўмак беришим кераклигини илтимос қилишди. Мен эса ҳали умуман пул олмаганимни, олсам албатта келишилган пулни беришимни айтдим. Шундан сўнг терговчи майли, унда ишингиз чўзилиб кетаверар экан-да, деб ишни баттар пайсалга солишди. Шу сабаб журналистларга мурожаат қилишга мажбур бўлдим», — дейди тадбиркор Бекзод Бердиев.
Қашқадарё вилоят ИИБ ахборот хизмати тадбиркорнинг мазкур айбловига жавоб берди.
«Чорвачиликка ихтисослашган хусусий корхона раҳбари Бекзод Бердиев оилавий тадбиркорликни ривожлантириш дастурига асосан чет давлатидан чорва молларини олиб келиб, аҳолига тарқатиш билан шуғулланиб келган. Иш фаолияти давомида 13 нафар фуқаро ундан чорва молларини алдов йўли билан олиб кетганлиги аниқланган. Ҳолат юзасидан Нишон тумани ИИБ Тергов гуруҳи томонидан Жиноят кодексининг 168-моддаси 4-қисми ‘а’ (жуда кўп миқдорда фирибгарлик) банди билан қўзғатилган жиноят иши айблов хулосаси билан тамомланиб, Нишон тумани прокуратурасига юборилган», — дейилади вилоят ИИБ ахборот хизмати маълумотида.
Вилоят ИИБ тадбиркор ундан пул сўраган терговчининг аудиоёзувини тақдим қилганини, аммо бу овоз терговни олиб борган масъул ходимга тааллуқли эмаслиги аниқланганини билдирган.
Қўшимча қилинишича, ҳозирда мазкур ҳолат юзасидан вилоят ИИБ маъсул ходимлари томонидан хизмат текшируви ўтказилмоқда.
«Дарё» воқеалар ривожини кузатишда давом этади.
