Наманган вилоятининг Тўрақўрғон туманида ўқитувчиларни икки ой давомида ободонлаштириш ишларига мажбуран жалб қилган мактаб директори жаримага тортилди. Бу ҳақда Бандлик ва меҳнат муносабатлари вазирлиги хабар берди.
Вазирликнинг маълум қилишича, ижтимоий тармоқларда «Ўқитувчи мардикорми?» сарлавҳаси остида тарқалган хабар юзасидан Наманган вилоят Бандлик бош бошқармаси Давлат меҳнат инспекцияси ўрганиш ўтказди.
Унинг натижаларига кўра, Тўрақўрғон туман ХТБга қарашли 51-сонли умумий ўрта таълим мактаб директори 2022 йил июнь ва июль ойиларида 10 дан ортиқ мактаб ўқитувчилари ва бошқа ходимларни ишдан бўшатиш билан қўрқитиб, уларни мактаб ҳудудида ободонлаштириш ишларига мажбуран жалб қилгани аниқланган.
Мактаб раҳбари Маъмурий жавобгарлик тўғрисидаги кодекснинг 51-моддаси 1-қисмига (меҳнатга маъмурий тарзда мажбурлаш) асосан (15 миллион сўм) жаримага тортилган.
Изоҳ (0)