Qashqadaryo viloyatining Nishon tumanida faoliyat yurituvchi tadbirkor Bekzod Berdiyev IIB tergovchisi o‘z ishini yakunlashi uchun tamagirlik qilib, undan pul so‘raganini aytmoqda. Bu haqda tadbirkor “Daryo”ga qilgan murojaatida aytib o‘tdi.
Tadbirkorning ma’lumot berishicha, u xorijdan nasldor chorva mollari olib kelib, aholiga tarqatish bilan shug‘ullanib kelgan.
“Yurtimizda prezidentimiz tashabbusi bilan har bir oilani tadbirkor qilish amaliyoti boshlangandi. Men ham ana shu jarayonda ishtirok etib, xorijdan chorva mollari olib kelib, aholiga tarqatganman. 2021-yili 13 nafar fuqaro mendan chorva mollari olib ketib, pulini bermay ketgandi. Shu sabab bu haqda 2022-yilning fevral oyida Qashqadaryo viloyat prokuraturasi, Nishon tuman prokuraturasi va tuman IIBga murojaat qildim. Murojaatimga ko‘ra, holat o‘rganilib, Jinoyat kodeksining 168-moddasi 4-qismi bilan jinoyat ishi ochildi. Va dastlabki tergov harakatlari boshlandi”, — deydi tadbirkor.
Tadbirkorning qo‘shimcha qilishicha, tergovni olib borayotgan IIB tergovichisi ishini yakunlash uchun undan ulush talab qilgan.
“Dastlabki tergov harakatlari boshlangan paytda tergovchi odamlardan oladigan pulimdan ularga ulush ajratsam, ishim tezroq bitishini aytib, mendan pul so‘radi. Ishim tezroq bitishi uchun men ham bunga rozi bo‘ldim”, — deydi murojaatchi tadbirkor.
Bekzod Berdiyev IIB tergovchisiga pul ham berganini, buni isbotlovchi dalillari borligini aytmoqda.
“Dastlab so‘ralgan pulni berdim, lekin ishim bitmadi. Birozdan so‘ng ular menga yana qo‘ng‘iroq qilib, IIBga tekshiruvchi kelganini, shu sabab moddiy ko‘mak berishim kerakligini iltimos qilishdi. Men esa hali umuman pul olmaganimni, olsam albatta kelishilgan pulni berishimni aytdim. Shundan so‘ng tergovchi mayli, unda ishingiz cho‘zilib ketaverar ekan-da, deb ishni battar paysalga solishdi. Shu sabab jurnalistlarga murojaat qilishga majbur bo‘ldim”, — deydi tadbirkor Bekzod Berdiyev.
Qashqadaryo viloyat IIB axborot xizmati tadbirkorning mazkur aybloviga javob berdi.
“Chorvachilikka ixtisoslashgan xususiy korxona rahbari Bekzod Berdiyev oilaviy tadbirkorlikni rivojlantirish dasturiga asosan chet davlatidan chorva mollarini olib kelib, aholiga tarqatish bilan shug‘ullanib kelgan. Ish faoliyati davomida 13 nafar fuqaro undan chorva mollarini aldov yo‘li bilan olib ketganligi aniqlangan. Holat yuzasidan Nishon tumani IIB Tergov guruhi tomonidan Jinoyat kodeksining 168-moddasi 4-qismi ‘a’ (juda ko‘p miqdorda firibgarlik) bandi bilan qo‘zg‘atilgan jinoyat ishi ayblov xulosasi bilan tamomlanib, Nishon tumani prokuraturasiga yuborilgan”, — deyiladi viloyat IIB axborot xizmati ma’lumotida.
Viloyat IIB tadbirkor undan pul so‘ragan tergovchining audioyozuvini taqdim qilganini, ammo bu ovoz tergovni olib borgan mas’ul xodimga taalluqli emasligi aniqlanganini bildirgan.
Qo‘shimcha qilinishicha, hozirda mazkur holat yuzasidan viloyat IIB ma’sul xodimlari tomonidan xizmat tekshiruvi o‘tkazilmoqda.
“Daryo” voqealar rivojini kuzatishda davom etadi.
Izoh (0)