Пауло Дибала «Рома» билан келишувга эришди. Футболчи тиббий кўрикдан ўтиш учун Португалияга учиб кетган

«Ювентус» собиқ ҳужумчиси Пауло Дибала фаолиятини «Рома»да давом эттиради.

28 ёшли футболчи римликларнинг таклифини қабул қилган. Дибала «Рома» билан 3 йиллик шартнома ва йилига 6 миллион евро маош борасида келишиб олган.

Паулога «Рома»нинг янги лойиҳасида асосий футболчилардан бири бўлиши ваъда қилинди, дея ёзади Жанлука ди Марсио.

Аргентиналик футболчи жамоа йиғин ўтказаётган Португалияга учиб кетган. У ерда Дибала тиббий кўрикдан ўтади.

Аввалроқ Паулога «Рома»дан ташқари «Наполи» ҳам қизиқиш билдираётгани хабар қилинганди.

Маълумот учун, 2015 йилдан буён «Ювентус» шарафини ҳимоя қилиб келган Пауло 2021/22 йилги мавсумда 15 та гол ва 6 та голли узатмага муаллифлик қилди. Мавсум сўнгида туринликлар билан шартномаси якунига етган Дибала эркин агентга айланди.