Рауль Гонсалес Каталония клуби таклифни рад этди. У «Реал»нинг иккинчи жамоасида ишини давом эттиради

«Реал» собиқ футболчиси, ҳозирда «Кастиля» бош мураббийи вазифасини бажараётган Рауль Гонсалесга «Эспаньол» жамоаси таклиф билан чиқди.

Рауль Каталония клуби таклифини рад этган. Мутахассиснинг «қаймоқранглилар» клуби билан муносабатлари жуда яхши, шунинг учун Мадрид афсонаси «Реал»нинг иккинчи жамоасида тўртинчи мавсумда ҳам қолишни хоҳламоқда.

«Реал» раҳбарияти Раулда келажакда асосий жамоани бошқариш учун керак бўладиган барча жиҳатлар бор деб ҳисоблайди. Клуб унга Сегундада муносиб иштирок этиш учун кураша оладиган сифатли футболчиларни етказиб беришга ҳаракат қилмоқда.

Рауль ёшлар мураббийи сифатида яхши натижалар қайд этган ва ҳозирда «Кастилья»да муносиб иш олиб бормоқда. Гонсалес Карло Анчелоттидан сўнг «Реал» бош мураббийи бўлиш учун асосий номзодлардан бири бўлиб турибди.

Рауль 1994 йилдан 2010 йилга қадар «Реал» шарафини ҳимоя қилган.