Ўзбекистон Россиядан энг кўп ёғоч импорт қилган мамлакатлар рўйхатига кирди

Ўзбекистон ва Хитой Россиядан ёғоч импорт қилиш бўйича етакчи давлатлар қаторига кирди. Бу ҳақда «Коммерсантъ» хабар берди.

Россиянинг ёғоч экспорти январь—июнь ойларида 3,4 фоизга ўсди — йилнинг биринчи ярмида хорижга 13,4 миллион куб метр маҳсулот етказиб берилди.

Жами экспортнинг қарийб ярми Хитойга тегишли. Мамлакат 6,5 миллион куб метрдан ортиқ ёғоч харид қилган.

Иккинчи ўринда Ўзбекистон — 976 минг куб метрдан ортиқ маҳсулот импорт қилган.

Европа ва АҚШ, ўз харидларини деярли 7 фоизга, яъни 3,8 миллион куб метргача қисқартирди.

Сингапур (650 минг куб метр) харидлар бўйича етакчилардан бирига айланди, у илгари ўнта йирик импортчилар қаторига ҳам кирмаган эди.

Рослесинфорг раҳбари Павел Чашчин хабар берганидек, сўнгги олти ой ичида Россия ёғоч маҳсулотлари экспорти асосан Хитой ва Ўзбекистонга етказиб бериш ҳисобига 10 фоизга ўсган.

Аммо экспертлар бу ижобий динамика июль ойидаёқ тугашини прогноз қилмоқда.

Бу 10 июлдан бошлаб Россия ёғочлари ва уни қайта ишлашнинг асосий маҳсулотлари импортига санкция кучга кирганлиги билан боғлиқ.

Аввалроқ Беларусь Ўзбекистонга ёғоч уйлар етказиб бериш устида ишлаётгани ҳақида хабар берилганди.