Хитой шарқидаги шаҳарлар коронавирус кластерлари пайдо бўлгани муносабати билан COVID-19 га қарши чораларни кучайтирмоқда. Бу ҳақда Reuters хабар берди.
Янцзи дарёсининг қуйи оқимида жойлашган Уси ишлаб чиқариш маркази дўкон ва супермаркетларнинг фаолиятини тўхтатди. Ресторанлар иши ҳам тўхтатилди, ҳукумат одамларга уйдан ишлашни тавсия қилди ва аҳолини шаҳарни заруратсиз тарк этмасликка чақирди.
Анхой провинциясидаги Си округи 760 минг аҳолини карантинга олди ва жамоат транспортини тўхтатди. Айтилишича, Хитойда янги касалланиш ҳолатларининг аксарияти Анхой шаҳрига тўғри келади.
Миллий соғлиқни сақлаш комиссияси маълумотларига кўра, Хитойда ўтган суткада COVID-19 га чалиниш бўйича 473 та янги ҳолат қайд этилган, улардан 104 таси симптом билан ва 369 таси симптомсиз кечган. Таққослаш учун: аввалги куни 268 кишида инфекция аниқланган эди – 72 кишида симптомли ва 196 кишида симптомсиз, Хитой буни алоҳида ҳисоблайди.
Хитойнинг энг гавжум шаҳри ва молиявий маркази бўлган Шанхайда бир кишида касаллик қайд этилган, деди шаҳар расмийлари.
Дунёда коронавирус билан касалланиш ҳолатлари яна ортиб бормоқда, ўлим даражаси эса пасайишда давом этмоқда, дея таъкидлади Reuters.
Изоҳ (0)